و كان في مواقف صعبة اوي ..
منهم واحد انا عمري ما هنساه ..
مرة كنت قاعد على قهوة و يظهر و الله اعلم كان في واحد متغاظ مني كان قاعد على القهوة و حاطلي حاجة - تقريبا حبوب صراصير - في الشاي ..
و انا و الحمد لله لا عمري شربت سيجارة و لا مخدرات و لا اي سكة من السكك دي ..
و اخري كنت بعمل دماغ من فيروز اناناس
و ده حطلي حاجة في الشاي من غير ما احس - و الحيوان - سابني اقوم اسوق من غير ما يحذرني ..
و كانت مسخرة ..
كل مطبات و بلاعات اكتوبر اللي كنت حافظهم عن ظهر قلب كلتهم كلهم ..
و كنت باخد المطب و اموت على نفسي من الضحك ..
و كان في شباب بيلعبوا كورة و حاطين طوبتين عارضة للجون ..
و قلت لصاحبي و انا منشكح اوي ..
اتفرج عليا بقى و انا بعدي بين الطوبتين دول في النص ..
كأني كنت بسوق في اوتو كروس مثلا ..
و هووووب ..
طلعت على طوبة منهم و جابت الكاوتش في الحال ..
و قعدت اضحححححححححححححك ...
و نزلت و انا بضحك ..
و نزلت الكوريك و الاستبن و انا بكركع و صاحبي موش فاهم ايه اللي بيحصلي ..
و بيضحك معايا او عليا الله اعلم ..
و حطيت الحاجات قدامي و قعدت اضححححك ...
و قلت لصاحبي انا نسيت بنغير الكاوتش ازاي و انا هموت على نفسي من الضحك ..
و كلمتني ماما على الموبايل ( الاريكسون ال T28) و سألتني انت فين ..
قلتلها موش عارف .. و انا بضحك ..
طب بتعمل ايه .. برده موش عارف .. و قلبي هيقف من كتر الضحك
و قولتلها كده بالنص..
- بصي يا ماما .. انا هقولك الحقيقة كاملة ( قولتها كاملاتان بالتنوين ) .. الكاوتش فرقع و انا ناسي هو بيتغير ازااي .. هاسأل صاحبي اللي معايا هو بيتغير ازاي و لا تاخديه تسأليه انتي و تقوليلي و لا ايه ..؟
و الحمد لله ماما ما شكتش في حاجة لانها عارفاني كويس و متأكدة انه عمري ما كنت هامشي في السكة دي ..
و صاحبي اخيرا لقط الموضوع و ساق بيا شوية لغاية لما دماغي تقلت و حسيت اني عايز انام ..
و طلعت نمت و لا 12 ساعة و قمت و انا حاسس انه دماغي دي فاااااااضية ..
و الله اعلم ايه اللي اتحطلي في الشاي ده ..
و رغم انه معرفناش نثبت على الواد ده حاجة ..
انما اصحابي رقعوه حتة علقة .. لمجرد انهم شكوا انه هواللي عمل فيا المقلب ده و سابني اقوم اسوق
