[فادي مكرم]

مساء الخير على احلى منتدى واحلى اعضاء

الموضوع ممكن ناس تشوفه مضحك وممكن تشوفه مقلق !!

النهاردة صدفة كدة داخل البيت بليل وبولع نور السلم اللي هي اللمبة بتاعة باب الشقة

اكتشفت عدم وجودها

سألت ف البيت قالو مش عارفين واستغربوا

نزلت على حارس العمارة

كلمته برضه ميعرفش حاجة....بس قاللي ان الجيران اللي تحتينا اتسرقت منهم برضه
وبيقولو مش اول مرة تحصل

الفار لعب ف مخي , خصوصا اننا لسه جداد ف الشقة دي والعمارة نصها شقق مقفولة
وفي فترة سنة حصل ان ناس كتير عزلت وجت سكان غيرهم
وكمان العمارة فيها شقة مكسورة ومضروب ورقها واللي فيها ناس شكلهم شمال ومايطمنش

المهم زي ما بيقولو ياروح ما بعدك روح والموضوع مفيهوش مجال للاستخفاف
تفكيري
1. ان فيه حد ف العمارة عنده مرض عقلي وبيعمل كدة غصب عنه ؟
2. الناس بتوع الشقة المضروبة دول بيزاولو السكان اسلوب تطفيش وكدة ؟
3. حرامي حدق بيفك اللمض عشان حاجة من 2 :
3.1 يشوف لو ركبت لمبة تانية تبقى الشقة فيها سكان او لا (عاوز يضربها برضه)
3.2 يشيل اللمبة ويخبط بليل وطبعا هنبص من العين مش هنشوف حاجة ونفتح الباب وياخد فرصته
4. واحد من الجيران اتزنق فى لمبة راح مستلفها مننا والجيران لبعضيها

ملحوظة....باب الشقة فوقيه اللمبة وفى لمبة تانية بتاعة نور السلم الاتوماتيك جنبها ب 20 سم بس مستواها اعلى و ف غالب الايام الاتوماتيك دة بيبقى مفصول
صعب يكون الشخص "طفل" او طوله اقل من 175 سم يا اما معاه كرسي او يقف ع الترابزين

هو دة طبيعي ؟؟ وهل حصل مع حد قبل كدة ؟؟