و لأن اللي بيكدب على بابا و ماما اخرته وحشة ..
ولأن اللي مربيتهوش الايام و الليالي اكيد هتربيه ال 128 ..
ففي يوم قررنا انه احنا زهقنا من كتر الاستيمشن اللي على القهوة اللي جنب الكلية و محتاجين نروح اسكندرية ..
يا جدعان بابا و ماما موش هيوافقوا ..
موش لازم يعرفوا يعني .. ده يوم واحد صد رد ناكل في بلبع و نيجي علطول ..
و رحنا اسكندرية في يجيي 4 ساعات كده ..
و بسه طبعا راقدة لينا في وسط الذرة ..
و اول ما شفنا البحر و الفتيس علق ..
لا اول و لا تاني و لا مارش و لا اي حاجة ..
و الحمد لله فضلت ماشية على التاني ..
لغاية لما وصلنا لعم عادل الميكانيكي ..كان راجل كبير و كبرة ..
و عم عادل قال طبعا لازم نحل الفتيس ..
طب الموضوع ده هيخلص في اد ايه يا عم عادل..
4 - 5 ساعات كده ان شاء الله ..
( طب فل انت بقى يا وائل اقعد خلص مع عمك عادل و احنا هنخلص مشاويرنا و نجيلك )
طبعا ده كلام اصحابي الاندال ..
و لما اتحايلت طب حد يا كلاب يقعد معايا قالولي هو احنا كل يوم بنيجي اسكندرية و لا ايه ..
و قضيت اليوم عند عم عادل ..
و قضى اصحابي الاندال يوم جامد جدا ..
و العجيب و الغريب انه عم عادل مرضاش ياخد فلوس نهائي ..
قالي انت على سفر و موش عامل حسابك ..
و لما تييجي اسكندرية المرة الجاية ان شاء الله ..
كرم و جدعنة اسكندراني مالهاش حل
و فعلا ..
كل لما باروح اسكندرية لازم اعدي اسلم على عم عادل ..
و من يومها ..
لم اسافر في اي حتة من غير اذن ابويا و امي ..
:wave 2W21: