ال 128 دي علمتني الادب ..
و رغم انه انا وقفت مع جميع صنايعية البلد في تصليحها ..
الا انه برده عمري ما فهمت حاجة في الميكانيكا ..
ليه .. معرفش
؟؟
و حينما تذكر ال 128 و كنت مسميها بسة على فكرة ..
حينما تذكر بسة لابد من ذكر المقالب ..
و مقالبها كانت تقيلة اوي
كنت زمان ايام الكلية بيبقى عندي محاضرة مهمة جدا الساعة 7 صباحا ..
و ركز معايا ..
محاضرة مهمة في طب الساعة سبعة صباحا ..
معناها انه في مادة معقدة منيلة بنيلة محدش مننا فاهم فيها اي حاجة ..
و انه في دكتور من دكاترنا العظماء ..
قرر انه يزكي عن علمه و صحته و فلوسه اللي بيجيبها زكايب زكايب
و انه يشرح لنا المنهج .. مجانا و لوجه الله ...
جزاهم الله عنا خيرا ..
بس الباشا البيه اكيد معندوش وقت فاضي في اليوم كله ..
فيكدرنا و يجمعنا الساعة 7 االصبح ..
و ال 128 محضرتش معايا ايام المحور
ايوه كان في ناس ساكنة في اكتوبر قبل المحور ..
فكان لازم انزل البيت الساعة 5.30 صباحا علشان الحق مكان في ام المحاضرة دي ..
و طبعا .. بسة ..
كان لازم تعملها في الوقت ده ..
و عايزة زقة ..
الساعة 5.30 صباحا في الشتا في مدينة اكتوبر سنة 99
حيث انت و الاشجار و العصافير و الاشباح و بس
و حتى مفيش مواصلات ..
بس لأنه الحاجة ام الاختراع ..
اخر شارعنا كان في منزل ..
فكنت بزق العربية لغاية المنزل ده ..
و اسيبها تجري تجري تجري و انا بجري جنبها ..
لحد اللحظة المناسبة اللي انط فيها و ارمي على التاني ..
: ROFL_C~118:
الله يسامحك يا بسة ..
و طبعا كنت لما باركنها في الكلية كنت بالوص اكتر ..
لأن مع وجود كميات هائلة من زمايلي ..
فمحدش عايز يزق ..
كله كان عاملي فيها عم الدكتور ..
و شكلي و برستيجي و منظري قدام الحتة بتاعتي ..
و مالقيش غير عم عاطف و عمال المشرحة اللي ينجدوني ..
و موش ببلاش طبعا ..
:ROFL_C~118 :