الكلام ده كان سنة 96..
كنت في اولى ثانوية ..
و كنت هموت عايز اتعلم السواقة ..
كنت متأخر جدا وسط اصحابي .. احنا كنا ساكنين في 6 اكتوبر .. و اكتوبر في التسعينيات كانت فاااااضية .. و كنا حاسيين انها بتاعتنا احنا بس .. و الشاب مننا كان بيسوق على تانية اعدادي بالكتير .. و انا وفي اولى ثانوي و محدش فاضي يعلمني السواقة و لا راضي يديني العربية وانا هتصرف
و الشباب اصحابي كانوا ميتوصوش .. لازم كل لما نتقابل كل واحد يحكي مغامراته بالعربية و المواقف و الطرائف .. و طبعا لازم يدي كلمة من تحت لتحت انه انا لسه بركب جنب ماما و هي اللي سايقة ..
و طبعا انا اروح البيت و اشوط في ماما ( ازااي كنت بعمل كده موش عارف ) و ازعق و هم طبعا عندي في البيت يعندوا معايا اكتر ..
لغاية لما واحد صاحبي خبيث جدا كنت قاعد باحكيله .. قالي انت اهبل يا بني .. انت الاول على المدرسة و عايز حاجة و مبتحققش .. ده احنا الواحد مننا ابوه بيقعد يوعده بكل حاجة في الدنيا علشان يادوبك ينجح في الملحق و انت موش عارف تظبط امورك ..
- طب اعمل ايه يابني ؟
- احنا امتحانات ( التيرم في اولى ثانوي ) كمان شهر .. ليلة الامتحان تسيب المذاكرة شوية و تفاتحهم بالموضوع و هما هيتجننوا لما هيلاقوا الموضوع ده شاغلك عن المذاكرة و هيعملولك اللي انت عايزه ..
:THUMBS~220 :
و اخترت ليلة امتحان الاحياء .. لأني كنت حافظ الكتاب - حرفيا - من الجلدة للجلدة علشان ابقى ضامن درجة الامتحان لو حصلت في الامور امور ..
و قد كان ..
ضربت معاهم خناقة مفتعلة ليلة امتحان الاحياء .. و في نص السنة اجروا سواق مخصوص يعلمني السواقة
علشان الباشمهندسة سلوى تعرف احنا كنا بنفكر و نخطط ازاي ..
و في اول يوم من اجازة نص السنة في اولى ثانوي خدت عربية بابا ال 128 موديل 86 الحمرا انا و السواق و انطلقت ..
و طلعت بالعربية و من اول مرة ..
و ماشي و انا عمال افادي البلاعات ( زي ما اصحابي بيعملوا طبعا ما انا حريف بالفطرة ) و السواق بيتطنط جنبي ..
لغاية لما كنت بفادي بلاعة من البلاعات و العربية عومت مني ..
و هووووووووووووووووووووووب. .
نطت العربية في حفرة في جنينة قدام بيت واحد صاحبي و غرزت فيها ..
العربية الحمد لله محصلهاش حاجة ..
و على حظي صاحبي ده كان غاوي تصوير ( مصور سينمائي دلوقتي هو )
و صور العربية و كتب على ضهرها ..
كيف تزرع شجرة فيات 128 في خمس خطوات ..
1- اختار جنينة كبيرة .
2- احفر حفرة مناسبة .
3- ازرع عربية 128 جواها و ثبتها لحد لما تغرز .
4- ارويها كل يوم .
5- انتظر حتى بداية الربيع لجني المحصول .
و طبعا الصورة دي شافتها كل البنات في المدرسة ..
: ROFL_C~118: