[تامر ديزل]

لليوم الخامس على التوالي وبنجاح منقطع النظير :
بورورم... بوروروم .. تيرارارارارارا
بورورم... بوروروم .. تيرارارارارارا
النهارده زي كل يوم روحت لحد المينا وبرضه ما فيش حد هيعدي ؟ طب واخرتها ايه ؟ بوروروم .. على فكره بوروروم هنا معناها اي كلام يعني معقول هيكون ردهم عليا بوروروم ؟ لأ بيقولوا اي كلام مالوش معنى
المهم الملحوظه اللي كنت عاوز اقولها من الاول واجلتها شويه لحد ما اتاكد منها تماما هيا اني عرفت مين اللي ورا الاعتصامات والاضرابات دي ؟ كل يوم كنت بشوفهم لكن كنت مفكر انهم ناس من ضمن ناس كتير معتصمين .. النهارده مكنش فيه غيرهم : مين ؟
ناس بجلاليب ودقون وشوم في ايديهم .. انا من الاول مكنتش عاوز اقول لان فيه ناس هتزعل لكن اذا كانوا هما مش مكسوفين من اللي بيعملوه انا اتكسف ليه اقول عليهم ؟
ايوه يا جماعه مجموعه من السلفيين في دمياط هيا اللي متزعمه الاعتصام ده ... طيب ليه ؟ تفتكروا ليه ؟
رايي الشخصي : استغلال انتخابي وظهور بمظهر المدافع عن الحق يعني من الاخر نعمل معركه نكسب من وراها مجد وسمعه وتاريخ نعاير بيه الناس احنا اللي قفلنا المصنع
زي الجماعه الكدابين اللي بيعايروا الشعب كله بالثورة وبيقولوا احنا اللي عملنا الثوره نفس المنطق ونفس الطريقه
انا عارف ان فيه ناس هتتضايق لكن اللي مش مصدق ييجي دمياط يشوف مين اللي واقف قاطع الطريق على الناس وبالمره يبقى يسألهم ليه
انا سألت واحد منهم اعرفه بحكم شغلي : قالي علشان المصنع وصحة الناس وحق الشهدا وبروروم بورورم تيرارارارا .... ام بوروروم بوروروم تيرارارارارا