[firstknight_eg]

يا جماعة انتوا ليه كلكوا بتدخلوا الامور ببعض ، الموضوع ببساطة انا هنتخب الحزب اللي هحس ان البرامج اللي هيطبقها هتخلينا عندنا تنمية اقتصادية سليمة مهما كان الحزب ده النور، العدالة، الوسط ... الخ.

هل لو انا ما انتخبتش حزب النور او حزب الاخوان ابقي كفرت؟؟ الموضوع كله مرتبط بالبرنامج الانتخابي، ايه هو البرنامج الانتخابي لحزب النور؟؟ هو ده المفروض يبقي اساس الكلام ، بلاش تسطيح الامور والكلام اللي ملوش لزمة زي لو السلفيين نجحوا هيحرموا كذا ولا لو الليبراليين نجحوا هيلغوا الاسلام. لان المواضيع ديه ملهاش علاقة لا بسلفين ولا ليبرالين ديه ليها علاقة بعلاقة الشعب بالاسلام.

الفيصل هو البرنامج الانتخابي ده واحد، صلاحية الشخص المتقدم للانتخابات ده اتنين.

لما حد يقولك انتخب حزب كذا لازم تنقشه في الموضوعين دول انتوا هتعملوا ايه عشان التنمية الاقتصادية والاجتماعية ومين اللي نازل الانتخابات ويفهم ايه في الاقتصاد والسياسية.

غير كده سفسطة بيزنطية وحوارات لا هتودي ولا هتجيب.

ويا ريت الاستاذ بتاع حزب النور يشرحلنا البرنامج الانتخابي للحزب عشان نتناقش فيه وايه هي الخلفية بتاعت المرشح اللي نازل في مدينة نصر