اهم حاجة المثابرة و النفس الطويل ..
كنا شوية شباب ..
ساكنين في 6 اكتوبر ..
طبعا انتم عارفين انه النقل ممنوع يطلع على المحور ..
و انه بعد الثورة اصبح المحور عبارة عن طريق للعربيات النقل يتخللهم بعضا من الملاكي ..
و النقل - على حد علمي البسيط - ممنوع من طلوع المحور علشان ميهبطش و الفواصل تبان و يقعدوا يصلحوا فيه سنتين زي ما حصل قبل كده ..
موش غتاتة و لا تمييز عنصري مثلا .. دي مصلحة حوالي 300 الف بني ادم بيستخدموا المحور يوميا ..
طيب ..
كان زمان في عسكري بيمنع النقل .. بقوا بعد الثورة يطنشوه ..
و قفنا احنا و عملنا لجنة .. كنا هنضرب او هنتفرم
قلنا نعمل حركة اشيك ..
معظم العربيات دي تابعة لشركات و مؤسسات كنا فاكرينها انها محترمة ..
زي جهينة و الاهرام و لابوار و امريكانا و خلافه ..
كلمنا الشركات دي بالذوق .. و ردوا علينا بالذوق ..و نفضولنا بالذوق برده ..
هددناهم احنا عاملين جروب كبير على الفيس بوك و هنقاطعهم .. وعدونا خيرا و لم ينفذوا شيئا ..
زهقنا .. و انشغلنا ..
و النتيجة المحور مليان عربيات نقل ..
الموضوع كبير و صعب ..
و اللي مجنني ..
انه انا لا سمعت مرشح مجلس شعب و لا غيره بيتكلم في الموضوع ده ..
يعني تنظيم المرور في البلد ..
و حل مشكلة القاهرة اللي خلاص بتفيص ..
و شبكات الطرق المتهالكة ..
و تعديل اخلاقيات و سلوكيات و قوانين المرور ..
و مصر المصنفة التالتة عالميا في حوادث الطرق ..
و توكيلات العربيات اللي بتشيل وسائل الامان من العربيات باعتبارها من الرفاهيات ..
يعني الحاجات دي موش مهمة لدرجة انها غير مدرجة على برنامج اي حزب - يقولنا حلول عملية و شاملة و متخططة - موش وعود مبهمة و غالبا وهمية ..
الف شكر يا باشمهندس على كلمة " ثقافة الحلول " ..
ربنا يوفقنا جميعا ..
