بما اني عدو الضاني الاول في مصر وعمري ما اكلها وببقي متضطر اسفا اني اروح علشان الجزار يدبحه ويخلص وباخد معايا كمامه بلبسها علي وشي علشان الريحة الفظيعة بتاعت الخرفان وطبعا جوانتي علشان ايدي متلقطش الريحة واتعقد العيد كله

وبروح لابس بنطلون براموده وتيشيرت ملهوش لازمه عندي علشان لو حاجه جت علي الهدوم ولا حاجه متبوظهاش

وانا عمال كل شوية اطلع البلكونه ابص علي الجزار علشان عنده زحمه موت وانا مبطقش الزحمه ومستني الدنيا عنده تهدي علشان اروح ادبح

بس طبعا مش انا اللي بدبح يا ما الحاج عندي ياما الجزار وغالبا بيكون الجزار

واطرف موقف حصل معانا كان السنة اللي فاتت واللي قبلها

نتكلم عن السنة اللي فاتت ديه كنت انا اللي هتنفخ فيها لاني اقنعت الحاج اني اشترك في عجل بدل ما نجيب خروف ووافق بعد اقناع دام اسبوع كامل

المهم حصلت نصابايه في العجل ده واللي خد مننا الفلوس علشان يجيبه خلع وقافل موبيله ولا نعرف عنه حاجه

المهم عدي يومين من العيد ولا حس ولا خبر عن الراجل اللي خد الفلوس

والحاج كفايا بس بصاته ليا واني ضيعت عليه ثواب الاضحيه في العيد المهم تالت يوم العيد لقيت صاحبي بيتصل بيا بيقولي خلاص هو اتصرف وجاب عجل المهم بقينا بنجري زي المجانين علشان نلحق ندبحه ونوزعه

ودبحاناه تالت يوم العيد الساعة 8 بليل وانا مكنتش مصدق نفسي الصراحه اننا ضحينا ومن ساعتها حلفت ماانا مدخل في اي اضحيه تاني


الموقف التاني كان من سنتين وكان مع خروف الجزار دبحه محسناش بيه ولا فرفر ولا اي حاجه وفضلنا مستنين بتاع 10 دقائق لما يفيص خالص

وجه الجزار يعبيه هوا علشان يسلخه لاقيناه جاتله الفوقه وقعد يرفص لما غرقنا كلنا دم تقريبا الخروف ده كان شارب حاجه ههههههههههههه