مشكلتى أبعاد العربيه والحك والخوف من الشوارع الضيقه
السلام عليكم ورحمة الله عليكم
انا يا جماعه جديد فى السواقه بقالى حوالى سنه بس مش بسوق باستمرار يعنى مره كل اسبوعين وساعات العربيه تقعد شهر واقفه ومشكلتى مش عارف احفظ ابعاد العربيه يعنى مثلا ساعات كتير اكون بركن او واقف فى اشاره واحسن انى خلاص هخبط فى العربيه اللى قدامى و لو نزلت من العربيه بلاقى فى مسافه بتاع نص متر بينى وبين العربيه الللى قدامى برده لما اكون داخل شارع جانبى و ضيق والمصيبه لو العربيات راكنه صفين ببقى مرعوب وخايف احك فى اى عربيه جانبى
واكتر حاجه مش بجيدها والمصيبه لو مثلا انا فى شارع رئيسى وهدخل شارع جانبى و العربيات ركنه على الصفين فى الشااع ومن اوله عالناصيه قبل كده حكيت فى عربيه بسبب الموضوع ده
علما بأنى بمشى فى الشوارع الرئيسيه و و الواسعه براحتى جدا
ملحوظه : انا أول ما اتعلمت السواقه كنت بمشى فى الشوارع الضيقه من غير اى خوف ولا قلق ومكنتش بحك " ممكن عشان كنت ببقى مركز زياده " لكن مره كنت ماشى فى شارع مش عارفه واول مره امشى فيه ومره واحده حكيت بالمرايه فى عربيه نقل راكنه و مرايتى اتكسرت ومره تانيه حكيت فى ميكروباص فى شارع اتجاهين بدون جزيره وهوا كان فى الاتجاه المعاكس بس هوا كان حادف فى الحاره بتاعتى
ومن بعد الواقعتين دول وانا فقدت الثقه فى نفسى وبقيت اتجنب ادخل اى شارع ضيق خوفا من الحك
وانا عارف انا مش ده الحل لان ساعات بيبقى مشوار ياخد عشر دقايق باخده فى نص ساعه عشان ممشيش فى شوارع ضيقه وده مش حل
انا كنت عايز اعرف من الناس الخبره فى السواقه اعمل ايه عشان احفظ ابعاد عربيتى كويس و ادخل بيها فى اضيق حته واعدى من خرم ابره من غير ما احك
أرجوكوا انا فى اشد الحاجه لنصايحكم تقريبا هيا دى مشكلتى الوحيده فى السواقه
|