[akerima]

والله يا جماعة انا عايز اقول كلام كتير في الموضوع دا ممكن يكفي كتب بس انا ححاول اختصر

الناس بتقول ان الثورة دي مش ثورة وان دي وقفة احتجاجية
انا بقول لا دي ثورة كان لها اهداف اتحقق بعضها ومازال بعضها لم يتحقق نعم الثورة تعثرت قليلا لكن مع الوقت باذن الله كل الاهداف ستتحقق ماننساش ان ثورة 23 يوليو كان قايم بيها الجيش اسقطت الملك لكن كان هدفها الرئيسي انهاء الحماية والاحتلال الانجليزي وهذا لم يتحقق يلا بعد 4 سنوات سنة 1956 ودي كانت ثورة جيش يعني تنظيم وادارة علي اعلي المستويات

الناس بتقول هي يعني الثورة عملتلنا اية ما احنا في نفس الحال والبلد هي هي
انا حسال سؤال واحد بس - انت عملت اية للبلد بعد الثورة
- هل غيرت من نفسك وسلوكياتك يعني مبقتش تخالف المرور ومابترميش ورق ولا زبالة في الشارع؟
- بقيت تتقي ربك في عملك وتشتغل طوال ساعات عملك بدون توقف؟
- بقيت بتتقي ربك في قرشك اللي انت بتكسبة وبتتحري الحلال وتتصدق علي الفقرا وبتزور دور رعاية الايتام مثلا؟
- بتعلم ولادك الصح من الغلط وان الغلطان لابد ان يحاسب ويجازي حتي لو كان رئيس جمهورية قائم او سابق حتي لو كان بطل الابطال وسيد الرجال؟
- بتعلم ولادك يعني اية حرية ويعني اية مناقشة بنائة ويعني اية انتخابات ويعني اية اختيار مناسب بدون مصالح؟

الناس بتقول ان الثوار خربوا البلد وحنشحت قريب
انا بقول طيب الثوار دول كانوا ناس وغلطت بس علي الاقل كانوا ايجابيين قدروا يعملوا اللي كانوا عايزينة - انت حتفضل سالبي لحد امتي تخلي اللي يسوي واللي مايسواش يتحكم في مصيرك لغاية امتي حتفضل سايبها وزي ما ترسي؟؟

اخيرا عشان مطولش وابقي بايخ

اللي قاموا بالثورة ناس كانت عايزة تعمل حاجة كويسة للبلد ومكانوش طالعين عايزين اي مصلحة شخصية ولا كانوا طمعانين انهم يحكموا البلد دي (انا من لرايي ان دي الغلطة الوحيدة اللي عملها الثوار) كتر الف خيرهم كفاية عليهم كدا والدور علينا بعد كدة ان احنا نصلح البلد دي دا فعلا لو حابينها وعايزنها تتصلح

ان الله لا يغير بقوم حتي يغيروا ما بانفسهم - بمعني ولا ثورة ولا حتي انفلاب حيغير البلد دي قبل ما احنا نتغيير ونبطل نتجادل في الهيافات ونشتغل علي الجد ونعمل لنفسنا اولويات - انا عن نفسي مش عايز من مبارك ولا اللي كانوا حولية حاجة غير الحقيقة مين اللي قتل اخواتنا وولادنا من غير زنب غير انهم وقفوا في الشارع وعلوا صوتهم
بس قبل دا كله نفسي نعمل لنفسنا من جوانا قانون ونظام نحترم فية حق وحرية الغير قبل ما نطالب بحقنا وحريتنا , قانون انساني شريف الالتزام بية نابع من جوا كل واحد فينا مش قانون دولة نلتزم بية بالقوة

ان وصلنا للمرحلة دي باذن الله ولا اي قوة في العالم حتقدر تفرقنا وبالتالي حنكون نفسنا قوة تقدر تقف في وش اي حد بدون خوف

يارب في هذة الايام الجميلة العطرة ان هذا حلمي ودعائي الهم فاستجب لي - امين