اولا :حد فيكم عارف مين هو تيودور هرتزل ..
مؤسس حركة الصهيونية العالمية ..
و مؤلف كتاب الدولة اليهودية ..
عارفين اول جملة كتبها ايه ..
" لكي لا ننسى "
كتب الجملة دي لكل يهود العالم علشان مينسوش اللي كان بيحصل فيهم ..
الاحتقار و التشريد و المعاملة العنصرية في جميع انحاء العالم ..
و قال ان النسيان ده افة الشعوب ..
فشكرا لكل واحد فكرنا باللي موش مفروض يتنسي ابدا ..
ثانيا ..
عارفين سوء الفهم ده فكرني بايه ..
فاكرين يا جماعة خطبة يوم الثلاثاء اللي قال انا موش هسيب بلدي و هاموت و هادفن في بلدي ..
يومها انا مراتي عيطت قدام التليفزيون ..
يومها ابن الايه قدر يقسم البلد نصين ..
و الناس على القهوة ( اللي كنا مبنعملش حاجة غير القعدة عليها الصبح ) و الناس في اللجان الشعبية ( اللي كنا مبنعملش حاجة غير التكتكة فيها بليل ) قامت بينهم خناقات و عصبية زي اللى احنا شايفينها دلوقتي ..
و اللي يقولك هي الناس اللي في التحرير دي عايزة ايه بقى ما خلاص الراجل عملهم اللي هم عايزينه ..
و اللي يقولك انا هانزل بنفسي و الم شوية المراقيع اللي كانوا هناك ..
عايزين البلد تشتغل و تنتج و نرجع اشغالنا بقى ..
و اهو ..
اتسجن .. هو و نظامه .. و لسه في ايدين بتلعب و بتوقف المراكب السايرة ..
تخيل بقى لو ماكنش اتسجن
ده نظامه بيلعب اللعبة دي حتى و هو مسجون ..
طول عمره سياسته يفرق بينا علشان يتظبط هو ..
بس بوقفتنا مع بعض و وعينا و مناقشتنا الهادية هنعدي بالمركب ان شاء الله ..
و هنحكي لولادنا احنا عملنا ايه ..
وشكرا لروحكم الحلوة ..
