المشاركة الأصلية كتبت بواسطة memodina1
والله مجهود ممتاز كفاية انك سايب لنا وقت من وقتك وفعلا لك الاحترام والتقدير بس سؤالى بالله عليك يا دكتور انا عندى 25 سنة اعاانى واعانى واعانى واعانى من مرض اسمة التهاب حاد ومزمن فى الجيوب الانفية
جربت كل الادوية مفيش فايدة دكاترة قالتلى اعمل العملية وانا شفت انها كذا واحد مجبش نتيجة معاة العملية
فدكتور الله يكرمة وصفلى قطرة اسمها اوتروفين اخدها تريحنى جدا ولا كانى فى اى حاجة الكلام دا من 7 سنوات كدة وانا بستعمل القطرة بعد معاناة من المرض بس بقيت مع الوقت استعملها مرة مرتين
سنة مثلا بقيت استعملها ثلاث اربع مرات والوقتى ممكن استعملها اقل حاجة 4 مرات وممكن خمسة كمان لكن مش اكتر من كدة اوتروفين دى عبارة عن مية وملح ومواد تانى دا كلام صيدلى ولما ذكرت حضرتك فى الموضوع افتكرت يعنى
سؤالى بقى
هل القطرة استعمالها يؤثر عليا فى المستقبل زى ادمنها او انها متعملش مفعول بعد كدة
وهل فى حل للموضوع دا اى حاجة ولو بالاف الجنيهات وشكرا لييك جدا
على فكرة اناا عارف انة مش تخصصك بس انت ممكن تكون سبب فى الموضوع وربنا يكرم
|
ربنا يكرمك يا باشا ..
و سلامتك الف سلامة ..
التهاب الجيوب الانفية المزمن ..
مشكلة مزعجة جدا و الدكاترة دايما بيتكلموا على اسبابها و اعراضها و مبيعرضوش حلول ليها ..
و رغم انه موش تخصصي بس انا بتعامل كتير مع حالات التهاب الجيوب الانفية مع الاطفال و هيبقى ليه موضوع لوحده ان شاء الله ..
و نصايحي لك الاتي :
- اشرب مياه و و سوائل دافئة كتيييييير .. السوائل الكتييير هي احسن مذيب للمخاط ..
- استنشق البخار .. كباية مياه مغلية و استنشق منها البخار .. و خصوصا اول ما تصحى و قبل ما تنام ( ممكن تغلى المية في حلة و توطي تستنشق البخار و انت على راسك فوطة .. او لو عندك شاور في البيت و تملى الحمام بخار )
- الاوترفين النقط في حالتك مفيدة جدا .. بس للاسف ممكن فعلا تتعود عليها و متقدرش تستغنى عنها و لذلك لا تستخدمها لفترة تزيد عن 7 ايام متواصلة و لازم تاخد منها اجازة
- جرب بخاخات الانف الملحية و شوفها هتجيب نتيجة معاك و لا لأ .. حاجة زي physomer nasal jet ....
- ابعد عن مضادات الهستامين زي ال Claritin مثلا و خصوصا لو المخاط لزج و تقيل ..
- ساعات جرعة محسوبة من بخاخات الكورتيزون بتكون مفيدة جدا ..بس دي لازم تحت اشراف الطبيب موش من نفسك ..
- اذا كنت لم تقم بعمل اشعة مقطعية على الجيوب الانفية فاعمل واحدة و متسمحش لحد ياخد قرار اللجوء للجراحة قبل عمل الاشعة المقطعية .
- ساعات بيقي مفيش حل الا للجوء للجراحة للاسف الشديد ...
- و لو قامت عليك الجيوب الانفية ( جه دور حاد يعني ) لازم يتعالج صح علشان ميزودش المشكلة ..
و يا رب اكون افدتك ..
و تقبل سلامي
