رد: الخوف من السواقه
رأيى من رأى الأساتذة اللى كتبو قبلى بارك الله فيهم ..
اول حاجة تشيل الورقة دى لان الغالبية العظمى هاتستصغرك فى الأمر ده وهايستهينو بك ويخنقوك , لو حصل تاتش مع حد ممكن ساعتها تقوله انك جديد فىالسواقة ده على اقل تقدير انما تحط ورقة فدى صعبة شوية ..
ثانيا تنزل فعلا فى وقت الذروة عشان تتعود على الضغط , وكثرة ممارستك للسواقة وبالذات فى الاماكن الصعبة ليها فائدتان وهما ان شعور الخوف هايروح تدريجيا وايضا هاتكون السواقة سهلة جدا بالنسبة لك فى الاماكن الاقل ازدحاما ..
والله انا لو مكان حضرتك هاخد العربية وانزل اسوق بيها فى كل حتة من غير ما اكون رايحة مشوار معين , بس هاقعد اسوق وخلاص لحد ما السواقة تبقى زى الملبن بالنسبة لى ومن غير خوف ..
انا مثلا بخاف من العربيات النقل والاوتوبيسات الكبيرة لو جيت جنبها , باحس انى تحتها وباحس ان السواق مش شايفنى ومع ذلك ده لم يقلل من عزيمتى على ممارسة السواقة لحد ما اوصل الى مستوى الرجال المتمرسين فيها
اهم حاجة لازم تعرفها ان مافيش حد هايركب معاك , وانك لازم تتحمل مسؤولية السواقة لوحدك , وانسى خالص فكرة بيع العربية ..
الهروب من الشئ مش حل , افضل حاجة المواجهة , والخوف ده هايروح مع الممارسة ومع الوقت ..
وتحياتى لحضرتك
|