اختلط الحابل بالنابل
وهي دي السياسه اللي ماشيه اليومين دول
ونغمه فين الديمقراطيه و الحريه اللي بتنادوا بيها
هي دي الثوره و مبادئها
وشويه وبدأنا نقول هي دي ثوره دي... دي احتجاجات ... حركه ... فتنه ... مؤامره !!!
وشويه و نلاقي ناس بتترحم على زمن مبارك و تقولك طيب يا ريت الحزب الوطني يرجع تاني ارحم من اللي احنا فيه دلوقتي ده
ولسبب بسيط جدا
ان الثوره حتى الان لم تكتمل
لو الثوره كانت كامله فعلا كانت عزلت تماما كل اعضاء الحزب الحاكم السابق والمجالس المحليه و المحافظين و كل المناصب السياديه و السياسيه و الحكوميه الحساسه
يعني بلد 80 مليون خلاص مفيهاش الا رجال العهد القديم !!!
لو الثوره كانت كامله كانت انتهت حاله الطوارئ و المحاكمات العسكريه (المزاجيه ) و ظهور احكام قضائيه مفعله للرئيس ( المخلوع سابقا - متنحي حاليا - شرعي مستقبلا !! )
لو الثوره اكتملت كان زمانا عايشين في ظل دستور جديد حقيقي و مجلس شعب و انتخابات رئاسيه
انا مش حتكلم عن المجلس العسكري و قراراته و منهجيته لانه للاسف هو المؤسسه الشرعيه الوحيده في مصر حاليا و لا بد من الالتزام بها حتى الوصول لشكل شرعي (الدستور المنتظر )
لو الثوره كامله مكناش حنلاقي قنوات بتتقفل و كتاب و صحفيين يمتنعوا او يمنعوا من تقديم برامجهم و الادلاء بارائهم
لو الثوره كامه كان القناصه ظهروا و اتحاكموا و قتله سيد بلال و خالد سعيد و غيرهم كتير من زمان
لو الثوره كامله مكنش جهاز امن الدوله اتغير اسمه بنفس الوجوه القديمه
لو الثوره اكتملت مكنش دكتور احمد عاطف اتخطف 6 ايام بطريقه استخباراتيه محترفه
لو الثوره كامله مكناش سمعنا ان في فلول بترشح نفسها بمبداء الديمقراطيه و الحريه
لأن الثوره بتقوم علشان تقضي على نظام موجود بالكامل و تبداء نظام جديد تماما
وهو ما لم يحدث حتى الان و تحت رعايه المؤسسه الحاكمه بحجه مبادئ الحريه و الديمقراطيه والعداله التي قامت من اجلها الثوره !!!
فالثوره لم تكتمل بعد حتى بعد مرور 9 شهور
وحتى وان اكتملت
قدامنا كتيييييير اوي عقبال ما نطهر نفسنا و البلد من الفساد و الانفلات و الفلول و المنتفعين و الافاقين و المنافقين و المستفيدين من النظام السابق
واللي بيحاولو بكل الطرق والوسائل انهم يستردوا مجدهم القديم
بالبلبله و التحايل واصطياد الاخطاء و زرع الفتن والاشاعات و كلمه الحق التي يراد بها باطل و التسويق للعهد القديم واظهار مساؤى الثوره و اخطائها و و و .....
وفي النهايه بدل ما نتناقش في مستقبل البلد و مستقبل اولادنا نلاقي نفسنا بنتخانق ونتناقش على فرعيات و ارهاصات و قمامه الافكار
بدل ما نلاقي نفسنا بنبص لقدام و ناخد خطوه جديده في الطريق الواسع الطويل
نلاقي نفسنا في دوامات من المشاكل و الفتن و المشاكل المفتعله والتحريض والتخوين و التهويل والتهوين و المتناقضات والتداعيات
لو الثوره اكتملت مكناش شفنا مشاركات زي مشاركه الاستاذ البربري !!!!
احنا لسه في نص الطريق ....
و الاراده الشعبيه وحدها والوفاق الشعبي والفطنه المصريه والرغبه الاكيده في انقشاع الظلم والفساد وابتغاء العدل والحريه والكرامه و مرضات الله والايمان الحقيقي والاقتناع الصادق بالحلال البين و الحرام البين دون تحايل او تفصيل ... هما الذخيره الحقيقيه اللي حتخلينا نصمد و نصبر و نصر و نقاوم حتى اكتمال الثوره
حتى لو بعد 10 سنين
مفيش حاجه بتتغير في يوم وليله ..
ان غدا لناظره قريب
ان الله لا يمل حتى تملوا