[فادي مكرم]

مساء الخير على احلى منتدى
الموضوع ان التجديد عندى والفحص فى شهر ابريل القادم
والوضع الحالي ل حشيشة يكسف بعض الشىء
وانا سميتها "حشيشة" لانها نادرة ومش منتشرة فى مصر خالص
اللي منتشر الموديل الاقل 1982
والعربية دايما عاملة دماغ ساعات تبقى 100 فل و10 وساعات تترج وتطلع دخنة
وساعات تدب فيها الروح وتشد مع لانسر و كرولا 2007 وتشرفني

المهم انا بلغت الحج اننا داخلين على شدة عشان الفحص

ومشاكل حشيشة تتلخص كالتالي :

1- الموتور خفيف وبياكل زيت و بنزين و بيترجرج انا بغير زيت كل اول شهر بحط 4 3 لتر وازود لما ينقص و فى اخر الشهر ببقى عملت مثلا 1500 كيلو وباقي 2 لتر فى المكنة
طبعا علبة زيت الشنبر اساسي مع غيار الزيت
وكدة عاوزة عمرة مكنة
والاحسن والافضل تسقيط مكنة

2- عندى شوية بارومة وشغل سمكرة عند الدلايات من العجل الامامي و اكيد هكتشف بارومة فى اماكن تانية بس ان شاء الله ميكونش غير اللي انا شفته لما رفعت العربية

3- الدهان فى العربية مرشوشة وش نضافة على عك , ودة طبعا لاني شاريها من تاجر لعدم الخبرة
المعجون بيشقق ويتقشر والباب الخلفي واخد خابطة و انا سايبها ع المعجون

4- محتاج طقم كاوتش وجنوط سبور والاكصدام الامامي متخيط فى الزوايا ومش عارف هلاقي منه جديد ولا لا بس عندى امل اني اوفق عليه بتاع الاكسل او السويفت

5- الكابينة من جوة محتاجة بس تغير جلد الطابلوه وفرش جلد ف الارضية بدل الموكيت بتاع الفابريكة

وفى طبعا حاجات كتير تتعمل زى شغل الكهربا و سماعات بس دول كدة يعنى مش فى الاولويات

فكركم كل نقطة من دول تكلف كام وايه اللي ممكن نستغنى عنه ؟؟؟
و الوقت لكل نقطة ولو غيرت لونها هتفرق فى حاجة ؟؟

واحب اقول اني على قد ما حشيشة مبهدلاني على قد ما بحبها وناوي اشتغل فيها لحد ما تبقى كدة

يجي واحد يقوللي ياعم لسه هتصلح وتشد......بص بيعها وهاتلك توك توك هههههه
او اقولك هاتلك حاجة قسط

طبعا دي حلول كويسة وكل حاجة بس الواحد بيحب الحاجة تبقى على ايده
العقل موجود والافكار موجودة والفلوس ان شاء الله موجودة
فاضل نتعب شوية....من طلب العلا بقى

والنتيجة ياريت تطلع زي كدة

تفتكروا ممكن ؟