رد: يا أهل الخبرة .. افتونى فى الماروتى المستعمل جزاكم الله خيرا
انا فعلا فكرت فى ال128 فى البداية لان دى اللى اتعلمت عليها السواقة , فى البداية الموضوع كان ماشى كويس وكان قدامى واحدة ب11000 وممكن تنزل وكانت حالتها كويسة الى حد ما وبعد الاستشارة قالولى ماجبهاش , قوللى ليه , اقولك ..
اخويا الكبير جاب لادا ب16000 من واحد جاره وبجد بجد اتلسع فيها جامد والعربية بقت عبارة عن ماسورة فلوس مفتوحة , لالالا بلاعة , لالالالا بعيد عنك بكابورت بيبلع فلوس , كان الله فى عونه , وكانت غلطته انه ماكشفش عليها وخد الكلام من جاره على طول , والتانى طبعا ماصدق خلص منها الله يسامحه , المهم ان والدتى ربنا يديها الصحة هى اللى كانت مسلفاه فلوس العربية , قررت ماتدينيش فلوس لعربية مستعملة , فكل ما اجيب لها سيرة عربية موديلات التمانينات او التسعينات ماترضاش , وطبعا اعلى من كده غالى , اقصد هايكون اكتر من 20000 اللى هى حيلتى , عشان كده مش قدامى غير القسط , وطبعا مش مستعجلة خالص , وقبل ما افكر اجيب عربية طبعا لازم اقول لاهل الخبرة واولهم حضراتكم طبعا , وكل تأخيرة وفيها خيرة , ويارب يرزقنا كلنا اللهم آمين
|