رد: كل واحد يقول احلي رحلة طلعها في حياته
حكاية رحلة
جدة - المدينة - مكة
كانت اول مرة ازور فيها الاراضى المقدسة و يا رب يبقى فى تانى
المهم هى كانت مأمورية عمل و كنا كتير
الجانب السعودى رحب بينا و ووفر لينا وسيلة مواصلات مجانية تحت تصرفنا طول الفترة
و فى يوم من الايام ال 8 ( الفترة الكلية لتواجدنا ) قسمنا نفسنا مجموعتين
المجموعة الاولى و كنت انا منهم نوينا نروح من جدة للمدينة و من المدينة نرجع على مكة
توكلنا على الله و ركبنا كلنا الأتوبيس او على الاقل الى كنا فاكرينه اتوبيس يعنى فى مصر لما بنشوف مخلوق كده زيه بنقول عليه اتوبيس
الاتوبيس ده متعين عليه اتنين سواقين سعوديين
قبل ما كمل القصة احب ااكد ان الحكومة السعودية كانت عاملة معانا الواجب و زيادة بأمانة
المهم السواق الى طلع معانا كان اسمه "على" ( رفيع و صغير شوية ) و زميله التانى كان اسمه عبد الله ( مليان شوية و متوسط الطول )
ركبنا و طلع "على" بسم الله الرحمن الرحيم ضرب المفتاح فى الكونتاكت و للاسف اتكسر المفتاح
يا دى الحوسة !!
طبعا تخيلوا تلات تربع الاوتوبيس ناس مهندسين و فنيين واحد زيى اقلهم فى الخبرة الفنية
ف "على" قال : الاتوبيس باظ يا رجالة !
الرجالة طبعا هأهأ أو باظ أيه يا معلم و جابوا العدة الى ممكن نفك بيها الاتوبيس و نركبه مش نطلع بيها مفتاح
بدون الدخول فى تفاصيل فنية الاتوبيس دار و على ساق بينا و طالع من الميناء
و الى جنبى حبيب قلبى زميلى ايهاب (شخصية كومدية رهيبة) قعد يقولى المعلم ده مش ناوى يطلع المشاور و انا اهدى فيه و اقوله لا يا اخى حرام عليك ان بعض الظن اثم
و فجأه لقيناه بياخد الملفات الى جوه الميناء كلها بسرعته ملفات 90 درجة بسرعة 30 و 40 و ايهاب يقولى و الهلع على وشه "على" عايز يقلب الاتوبيس عشان ميروحش المشوار
يا اخى بلاش الكلام ده هو بس مش واخد على الاتوبيس ( "على" يمتلك عربية زلاموكة و عبد الله كابريس فطبعا الاتوبيس عمرهم ما بيسقوه الا مضطرين الكلام ده كان 2001)
المهم "على" معرفش يقلب الاتوبيس ( استغفر الله ) قصدى خرج من الميناء بسلام هوب الاتوبيس قعد يقطع و راح مبطل
فى ايه يا باشا ؟
"على" : يا رجالة الاتوبيس معلش قطع بنزين !!!!!!!!
الصراحة "على" راح متصل بعبد الله و على الفور جه عبد الله بجركن بنزين و قعد يدلقه فى الهوا بينشن على الفتحة بتاعة التانك و لحقناه و عملنا قرطاس عشان البنزين يدخل فى التانك
و توكلنا على الله
الصراحة "على" اتبهدل فى المشوار طبعا المسافة مش فاكر 470 كم تقريبا و لسة المفروض حيرجعهم تانى فى نفس اليوم
كانت اول مرة اشوف السعودية العربيات ماشية ( ماشية ايه ) طايرة من جنبنا على الاقل 150 و ممكن 200 و احنا حاسس ان بنرجع مارشيدير الاوتوبيس فعلا اخره 60 و فى المطالع يكاد يكون حيقف و الدركسيون فيه بتاع لفة و نص بوش
يعنى "على" طول السكة يا عينى عمال عرض مستمر يجيب الدركسيون يمين و يجيبه شمال عشان يحافظ على الخط المستقيم
اكدلى حيرتى من الافلام الابيض و اسود ليه البطل طول ما هو سايق المفروض لقدام عمال يجيب يمين فى شمال
فيييييييييييييييين واحد من السواقين بتوعنا قرر ان يريح "على" و فعلا معرفش يسوق الاتوبيس و "على" بدل ما يغفل و يريح شوية قلق طبعا لنعمل حادثة و اتضطر يكمل هو تانى
و قعدت انا اذكر الله و اتفرج على جمال الجبال و استراحات سيسكو الى على الطريق ظريفة جدا سيسكو
الحمد لله وصلنا المدينة يا دوب 2 الفجر ( احنا طالعين 10 الصبح مثلا ) طبعا "على" قلع لبس الشغل و ضرب جلابية و انهار جوه الاتوبيس نام عقبال ما نخلص
لما الصبح طلع ابتدينا رحلة مكة و المفروض نحرم فى ابيارعلى طبعا دى غير "على" بتاعنا
و ما شاء الله الاتوبيس كله مثقف دينيا و كتيبات و جدالات المهم اتفقوا ان فعلا المفروض نحرم فى ابيار على
يلا يا "على" طبعا عارف ابيار على ؟
"على" جه عند اول استراحة سيسكو و قال لنا هى دى ابيار على
يا راجل ؟! قول كلام غير ده
طب انهى سيسكو فيهم دا انا عادد يجى 5 على الاقل و احنا جايين
لأ هى دى انا متأكد
طبعا مصدقناش و الحمد لله وصلنا ابيار على الحقيقية حاجة فخمة و تفرح و احرمنا و ركبنا تانى و طلعنا
و تقريبا فى منتصف اللا مكان حيث الصحراء من كل جانب و صوت الريح بيصفر
الاتوبيس قعد يفرقع و بطل
يا حلاوة !!!!
كله بص ل "على" و هو نفسه كان باين عليه حيعيط و بدون كلام لقيناه نزل و بيعدى الشارع مش عارف ليه و بعدين بيعدى يرجعلنا تانى و كله بيبص عليه من الشبابيك مش فاهمين هو بيعمل كده ليه بس انا كنت متوقع و خايف ان عربية من المعديين ال 200 ممكن لا قدر الله تخفى "على" فى لمح البصر
المهم "على" اتصل بعبد الله الى المفروض حيروح يجيب ميكانيكى و يجلنا من جده هههههههههه
طبعا الرجالة الحمد لله كان لسة معاهم العدة
و بيفكوا عمة الكاربريتور لقوا مسمار ملهوش علاقة بحاجة فى الكاربريتور واقع محشور فى البوابة طلعوه و الاتوبيس اشتغل تمام ( فلاش باك : "على" طالع من الميناء بيلف بسرعته فى الملفات و المسمار مش عايز يتعتع يقع فى البوابة ......... استغفر الله اللهم اخزيك يا شيطان)
تفتكر يا "على" حتى لو كانت عطلت فى الميناء كنت حتهرب من المشوار ههههههه
ايهاب قالى لسة برضه بتقول حرام عليك ان بعض الظن اثم ؟!!
قولتله دلوقتى دليل واضح
المهم الحمد لله رجعنا بالسلامة و "على" تقريبا و الله اعلم قال لعبد الله : بص يا عبد الله يا ابنى مفيش فايدة الاعطال مش حتنفع مع الجماعة دول حتطلع حتطلع مع المجموعة التانية
عبد الله طلع انصح من على و ربى المجموعة التانية من غير اعطال و لا دياولو برضه جالهم فى منتصف اللا مكان و قالهم اتغدى اتغدى
تتغدى ايه يا عم و فين طبعا هو بيتصرف و بالليل اتعشى اتعشى !!!!!!
و هما راجعين بملابس الاحرام فى نص الليل ( تك تك تك  )
عبد الله : حنام
تنام ايه ********* حرام عليك
احد الزملاء زعق فيه و قال له مين ريسك قال له فلان كله حكلمه دلوقتى حيبهدلك
عبد الله 
فين التليفون ..... صحراء صرير الرياح ظلام دامس
التليفون بتاعك يا عبد الله بعد اذنك عشان نكلم الريس بتاعك عشان يبهدلك
عبد الله :
و عبد الله دخل ينام فى مسجد مهجور و الباقى اضطر يناموا فى حضن بعض من التلج
بس كله بثوابه
بكرر تانى الجانب السعودى غير ملام عمل ما فى اقصى استطاعته لتوفير كل سبل الراحة و الانتقال مجانى هو بس عبد الله و على كانوا مش ناويين يطلعوا المشوار خصوصا بالاتوبيس المتعب ده هو اتوبيس نضيف بس تقريبا مبيمشيش
__________________
سبحانك لا علم لنا الا ما علمتنا
|