[magdy m.s]

المشاركة الأصلية كتبت بواسطة asom_6 بص حضرتك موضوع التعامل مع البنوك ده فى شبهه والله اعلم .. ولأن اختلاف العلماء رحمة فالبعض اباح التعامل مع البنوك والبعض رفض وانا وانت وعامة الناس من حقنا نتبع اى من الجانبين وكل منهم مسئول عن فتواه وملزم بتبريرها امام رب العالمين. ولأن انا زيك شخص عادى ومش متبحر قوى فى علوم الفقه ومن واقع تجربتى الشخصية فى شراء سيارة جديدة بالتقسيط وجدت امامى نوعين من اساليب البيع بالتقسيط من البنوك :- 1- النوع الاول هو ان البنك بيديك قرض لشراء سيارة وهو فى النهاية قرض نقدى من بنك تحتسب عليه فائدة على حسب قيمة القرض ومدة السداد وليس للبنك علاقة بالمعرض او التوكيل وانما يعطيك البنك شيك بقيمة القرض موجه للمعرض او الوكيل لضمان استخدام القرض فى شراء السيارة وليس شىء اخر وطبعا ضمان القرض تحدده انت والبنك سواء تحويل مرتب او وديعة او او او ... هذا النوع من اسلوب التقسيط انا شخصيا لم اشعر معه بالراحة وللاسف هو السائد فى معظم البنوك 2- النوع الثانى هو انك تحدد للبنك نوع وماركة السيارة المطلوبة ويقوم البنك بشراء السيارة كاش باسمه هو اولا ومن ثم يبيعها لك بالتقسيط من البنك لك وهنا لا تعامل لك مع المعرض او الوكيل وانما انت تشترى من البنك سلعة بالتقسيط وطبعا سعر السلعة بالتقسيط يختلف عن سعر السلعة كاش لان البائع انتظر على فلوسه لمدة اطول (مدة السداد) ... هذا النظام ارتحت له اكثر واشتريت به فعلاً واستلمت من البنك فاتورة شراء واذن استلام من مخازن البنك وجميع اوراق الملكية كانت باسم البنك ومبايعة البنك لى وهذا النظام وجدته فى بنك ناصر الاجتماعى وضمان السلعة التى استلمتها ولم تسدد ثمنها بالكامل بعد هو ايضا تحويل مرتب او وديعة او او او كما تتفق انت والبنك وده طبعاً بعد ما لفيت شوية عالبنوك المختلفة واستقريت فى النهاية على بنك ناصر الاجتماعى لعدة اسباب :- 1- الفايدة فى بنك ناصر 6% بس ولكن باقى البنوك من 7.5 الى 10 % 2- التأمين على السيارة موش اجبارى ومن حقك تأمن او متأمنش براحتك البنك لا يلزمك فى هذه النقطة 3- كل المبلغ اللى كان متوفر معايا كان حوالى 40000 بس ودا كان هيبقى مقدم فى اى بنك اخر لكن فى بنك ناصر حطيت مبلغ 30000 وديعة لمدة خمس سنوات (مدة الاقساط) ودفعت مقدم 10500 والباقى على خمس سنوات والقسط الشهرى 1300 جنية بعد حساب 6% فائدة سنوية لكل سنة (مدة التقسيط حتى 7.5 سنوات بحد اقصى) بس خد بالك ان الوديعة كمان بتحقق فايدة سنوية 10% تقريبا ,يعنى فى النهاية فايدة القرض مع فايدة الوديعة بيلاشو بعض وبتكتتشف انك بعد مدة السداد دفعت فقط تمن العربية الاصلى بدون فوايد --- يعنى اشتريت عربية زيرو بنفس تمنها وبالتقسيط --- وبنفس المبلغ اللى كنت هتدفعه مقدم لبنك تانى 4- لا يوجد شيكات او ضمانات من اى نوع وانما هى الوديعة وبس ضمان العربية بجانب الحظر طبعاً المكتوب فى الرخصة ويجدد سنويا بخطاب من الفرع اللى مقسط منه بدون انتظار وانت واقف المهم تنتظم فى السداد. 5- سداد الاقساط شهريا فى الشباك لغاية يوم 15 فى الشهر بدون فوائد وبعد يوم 15 تطبق غرامة 1.5% يعنى بتاع 15-20 جنية باقى البنوك من يوم 2-3 فى الشهر تبدأ الاتصالات والرخامة وفين القسط يا استاذ دى يا باشا باختصار تجربتى مع بنك ناصر والحمد لله استلمت العربية فى خلال 10 ايام والورق المطلوب كان صورة بطاقة ووصل مرافق ولا تحويل مرتب ولا مفردات ولا حتى استعلام بالبيت .... وعلى فكرة فيه ميزة مهمة كمان زى ما قلت ان البنك هو اللى بيشترى العربية باسمه ويبعهالك بالتقسيط يعنى الموضوع مش قرض وفايدة لأ سلعة بالتقسيط

مع احترامي لراي حضرتك- بس انت اخت فائدة 10%علي الوديعة - ودفعت فائدة للبنك 6% علي القرض- معني ذلك لو كان الرأي الذي يري ان التعامل مع البنوك حرام يعتبرك دافع فوائد وقابض فوائد- وانا اري ان الشخص امامه اكثر من راي لعلماء الدين ( الاختلاف رحمة ) المهم عندما ياخذ براي معين ياخذ به كله (وليس جزء منه فقط) ثم يثبت عليه - بمعني طالما تعاملت مع البنك اذا انت اخذت بالراي الذي لا يحرم التعامل مع البنوك مترجعش بقه تقول ان العملية مكيتة بعضها ويبقي مفيش فوائد ( مش انت دخلت البنك اذا انت مقتنع ان الفوائد مش حرام رجعت تاني ليه وبتحاول تثبت ان مفيش فوائد خايف منها ليه طالما مقتنع انها مش حرام ) - لا فيه فوائد دفعتها وفوائد اخذتها --علي فكرة كل علماء الدين لا يختلفوا في ان الربا حراااااااااااااااام --- ولكن الختلاف بينهم هل الفائد ربا ام لا - ومتي تكون ربا ومتي تكون لا- هذا موضوع كبير يحتاج ان يخصص له موضوع مستقل ياريت احد الاعضاء يفرد هذا الموضوع - بس انا معرفش لاني علي ادي ومتواضع جدا في الحاسب الالي وسرعة الكتابة--وربنا يهدينا جميعا ويغفر لجميع المسلمين-وشكرا