[تامر ديزل]

من الاول الرد موجه لكاتب المقال وليس للزميل ناقل المقال
كنت عاوز اعلق تعليق كوميدي واخرج وبعدين قلت هيبقى الرد كلكم بتتريقوا ومحدش بيرد رد موضوعي
بص ياباشا هنفصص المقال
الكلام عن عمرو حمزاوي مالوش علاقه بلب الموضوع ومش هنوصل من مناقشته لحاجه ورغم اني مبحبش حمزاوي بس ده بره الموضوع
نيجي للبنيه الاساسيه ومقارنتها بالسعوديه ؟ لو ما كانش فيه سرقه كان زمان البنيه الاساسيه قد الموجود تلات او اربع مرات وادي بالك احنا محشورين ف مكان ضيق يعني مش مكلفينه طرق طويله عريضه زي السعوديه الطريق الواحد بتلات طرق رئيسيه ف مصر ولا مكلفينه يمد شبكة كهربا متفرعه ولا اي حاجه من اللي بنشوفها ف الدول التانيه اللي كانت ماشيه معانا ف التمانينيات زي كوريا ولا اللي بداو بعدنا بعشر سنين زي تركيا وماليزيا واندونيسيا
هبسطهالك : انت بتقبض 5000 جنيه شهري ممكن منهم تعيش نفسك ووتفرتك فلوس في الفاضي والعيال يبقوا مبسوطين لما تيجي تطلع معاش بعد تلاتين سنه خدمه هتلاقي عندك عيال كانوا عايشين مبسوطين بس كان ممكن تعمل لهم احسن من كده بكتير لانك كان ممكن من نفس المبالغ تبني مستقبلهم وتوقفهم على رجليهم شوفت بقى بعد تلاتين سنه هتحس بالتقصير وهما مش هيرحموك لانك ضيعتهم
شوف بقى اللي قعد تلاتين سنه يسرقنا هوه ومعارفه واصحابه وصحاب ولاده ؟ استنى كده .... هواانت فاكر انه كان ممكن يسرق من غير ما يعمل مشروعات ولا بنيه تحتيه ..... يا جماعه اللي فاهم كده يبقى غلطان هواالميكانيكي الحرامي هيسرقك امتى ؟ لما تروح له عاوز تعمل شغل يقوم يسرقك ويغلي عليك .. هوا كمان وحكومته الحراميه كان لازم يعملوا مشاريع يعرفوا يسرقوا من وراها ... ف معلش المشاريع دي والبنيه دي شئ طبيعي ونمو طبيعي واقل من الطبيعي هوا انت كمان كنت عاوزه ميعملش الحاجات دي ؟ امال كنت عاوزه يعمل ايه ؟ امال هوا كان رئيس ازاي؟
وبعدين الثوره قامت علشان الظلم الكاسح مش علشان مافيش بنيه تحتيه
نيجي للامثله بتاعت فرنسا وامريكا وبريطانيا عندهم عشوائيات وسرطان وبوظان ماشي وعندهم صناعه وعلوم تقدم يعني نقارن نفسنا ف المرض بس؟ منطق غريب
وبالنسبه لمجانية التعليم ف عصر مبارك فخلينا نسميها باسمها الحقيقي دي كانت مجانية التهريج مبدفعش حاجه علشان مبتعلمش حاجه دي حقيقه تعليم مضروب بالصرمه مع سبق الاصرار والترصد
لاتعليق على يوسف بطرس ورشيد محمد رشيد او يوسف والي ولا نظيف ومحمد ابراهيم سليمان لا تعليق
الموضوع اللي ممكن نطلع بيه من المقال هوا المصالحه الوطنيه حتى لما ضربت مثل ضربته غلط احنا مكانش عندنا تمييز عنصري علشان نعمل زي جنوب افريقيا ولا كان فيه نزاع مسلح مع متمردين زي الارجنتين او السلفادور
دي كانت عصابه بتشفط دمنا مينفعش نتصالح معاهم
اما النقطه الخطيره الوحيده هيا ان الشعب كان غارق ف الفساد ويجب محاكمة ثلات ارباعه دي صح ايوه صح تعالا حاكمني علشان انا دفعت رشوه بالاجبار والاكراه علشان اطلع رخصه
ياباشا : لو انا ساكن في شارع المجاري طافحه فيه مغرقاه ينفع اعدي من غير بنطلوني ما يتوسخ ...... غصب عني والشاطر اوي كان بيرفع بنطلونه ودول قله كانت مجاهده انها تمنع نفسها من دوامة الفساد انما الباقي من الناس العاديه كان بيدوس ف المجاري غصب عنه انما البهوات اللي فتحوا ماسورة المجاري وغرقونا وبهدلونا ووسخونا ودمروا البلد ودمروا نفسيتنا نتسامح معاهم ازاي ؟
دا احنا لسه قدامنا سنين على ما نشفط الميه المعفنه وننضف المكان والاهم من كده نتعود على النظافه مهوا ممكن نلاقي بعض الناس تقولك لا انا خلاص ادمنت ريحة المجاري ماليش دعوه عايز مية مجاري
معلهش كورسير حبيبي كان بيسأل المرض ده مالوش علاج ؟ متهيألي قرصين استربتوكين بتاع الاسهال ممكن يجيبوا نتيجه تلات مرات ف اليوم ع الاقل هيخف الضغط شويه على ماسورة المجاري