كنت حعمل حادثة فى شارع 45 فى الاسكندرية
فى اخرة يعني , الملف الى بعد الطريق الدولي
الى بتاخدة على شان تطلع على البحر
انا كنت مطول مكنتش ناوي اخد الملف
انا ماشي والملف قدامي بـ 4 متر او 3 متر
والشارع مليان عربيات ولقيت عربية على اليمين ومش مدية اشارة ولا حاجة قلت فلة انا صح والى ماشي صح
وفجأة .؟.!!
ومرة واحدة ودون سابق انذار لاقيتها حدفت علية حدفة منيلة بنيلة
وانا كمان دون سابق انذار معرفش ازاي ايدي نزلت على الهاند بريك وعملت حتة خمسة فى الشارع كنت حلبس فى الرصيف
الحاجة الى فرستني جدا
ان بعد ما عدت من قدامي بصيتلي بصة وكأني راكب عربية كارو
وبيني وبينكم انا كنت نازل على شان اهزق الى سايق العربية بس طبعا لقيتها ست مينفعش ومفيش حتي اعتزار ولا كأنها عملت اى حاجة .
بقيت واقف فى الشارع بضرب كف على كف ومن يومها وانا بخاف امشي جنب ستات وسابقا كنت بخاف امشي جنب التريلات
بقت ستات وتريلات .. "الاتنين فى نظرى واحد "
خليهم فى حالهم وانا فى حالة