[magicsoka]

السلام عليكم يا شباب، أنا معايا لانسر كريستلة مو98 اوتوماتيك لونها زيتي، من اسبوعين و انا رايح الشغل الصبح لقيت ميكروباص بيسموه "الترامكو" هو بصراحة مش ميكروباص، هو أقرب لدبابة أو مدرعة، عربية متصنعة مخصوص علشان اذية الناس، المهم كان ماشي عكس في الشارع و دخل في العربية وش في وش و هرب و معرفتش اجيبه، العربية و شها باظ، بس الحمد لله الشنب متأثرش كتير قوي يعني، هو بس الرادياتير عايز اجيب واحد غيره طبعا لأن اللي موجود دلوقتي مش هينفع يتصلح، و كمان الوش كله باظ، انا بصراحة عمري ما اتعاملت في موضوع السمكرة و الدهان، و هي العربية اساسا كانت متخربشة كتير من بره و كنت شاريها فيها معجون كتير، كنت عايز اجيبها على الصاج و اعملها من الاول على نضافة، بس المشكله زي ما قلت انا عمري ما اتعاملت مع سمكرية او في الدهان، و بسمع كتير عن النصب و الزمة اللي مبقيتش موجوده خالص دلوقتي و انقرضت مع الديناصورات، فكنت عايز اي حد يدلني على سمكري و بتاع دهانات يكونو ولاد حلال و شغلهم كويس و عندهم زمة و كمان سعرهم حنين، و كمان عايز سعر السمكرة بس مع العلم ان كل اللي هيتم استعداله في العربية هم الرفرفين قدام و الوش و الكبوت و العربية كلها فيها مرمات بسيطة قوي لا تذكر، عايز اعرف سعر السمكره هتاخد كام تقريبا و الوقت قد ايه علشان ارجع العربية زيرووووووووو زي الأول، مع العلم إني من عين شمس و ساكن في شارع أبو الفتوح عبد الله، و ليكو الأجر و الثواب عند الله، و أرجو تعذروني على الإطالة بس الموضوع ده مقلقني جدا و راكن العربية بقالها أسبوعين علشان مش عارف أعمل بيها ايه، شكرا ليكم يا شباب

معلش نقطة أخيرة، بعد الكلام ده كله تنصحوني إني أمشي في موضوع السمكرة ده و أصلحها،و لا ممكن أبيعها على حالتها كده أحسن و أريح دماغي؟