[mr_astra]

عشان تقيس كفائة المحرك فى بنزينة عندها الجهاز دو وتطلعلك النتيجة بالنسبة المئوية
لكن لو حضرتك هاتشترى عربية موديل قديم او مش حابة تروح بنزينة والكلام دة دعنى اوضحلك الامور
اولا من الحالة العامة للمحرك يعنى مفروض انة ميكنش علية اى اثار تسريب زيت من فوق او من تحتاو فى اى اجزاء مكسورة ومعمول فيها لحام ودة بيبان بالعين المجردة
تانى حاجة لو عربية عجبتك وبتخلص فيها خلى صاحب العربية يفضل مدور الموتور اثناء الفصال والمنهدة وفيها وفيها عشان الموتور يسخن ويقول اللى عندة وبيشتكى من اية
خلاص حسيت ان الموتور سخن ووصل لدرجة التشغيل
شيل خرطوم الفايز اللى خارج من الموتور وواصل للكربراتير وبص علية بيطلع هوا فقط يبقى تمام
بيطلع هواء مع بخار زيت على هيئة دخان لونة ازرق يبقى عاوز طقم شنبر
تانى حاجة تدينى امبليهات بنزين وتشوف الشكمان بيطلع دخان عامل اية او لونة اية ........طلع دخان لونة ازرق يبقى وش السلندر عاوز شغل وجلد صباب
طب فى حاجة كمان تعرف حالة الموتور منها ودى مهمة جداااااااااا تسمع صوت الموتور والطبيعى والمفروض ان الصوت يكون هادى وبدون اى اصوات تخبيط او رنة او ترزيعة ........وكلمة ترزيعة دى مهمة جدا جدا جدا
طب تعالى نعمل حركة حلوة اوى ونشوف الموتور دة فعلا بيعد 4 ولا فى مشاكل
والموتور شغال شيل سلكة بوجية رقم 1 و 2 و3 و 4 وتشوف كل مرة هل الصوت اختلف والموتور حس ان السلكة اتشالت ولا الصوت متغيرش لو الصوت اتغير فى كل مرة فعلا يبقى الموتور حاسس بكل بوجية وان ما فيش بوجية ضعيف
تعالى بقى من عند الشكمان واسمع الصوت بودنك او حط منديل ورق وشوف حركة المنديل من دفع العادم الخارج من الشكمان منتظمة ولا مبرجلة .........منتظمة يبقى تمام مبرجلة يبقى فى اختلال فى الحريق
اخر حاجة بقى تسمع صوت ديل الشكمان ومعلش اعزرنى فى الفظ دة لانة اقرب لفظ للصح تشوف هل ديل الشكمان بيتفتف مع دوسة البنزين ولا لا لانة لو بيتفتف يبقى فى صباب مش بيقفل كويس وانا عارف ان دى صعبة شوية وعاوزة تعود للودن
نوجز الوان العادم فى الكلمات التالية
دخان لونة ابيض.....دة بيعبر عن بخار الماء وان الموتور بحالة ممتازة وعادة ما بنشوف بخار المية دة فى الصباح الباكر او بليل والمحرك بارد
عادم لونة اسود .....دة بيعبر عن خليط وقود غنى بالبنزين اكثر من الازم ولا يعتبر خطر او عيب موتور
عادم لونة ازرق .......دة يعبر عن وجود زيت محترق بالوقود ودة خطر وبيعنى ان الموتور عاوز شغل سوا جلد صباب او طقم شنبر
اخير تقبل تحياتى