المشاركة الأصلية كتبت بواسطة horas3000
الله يخليك و يكرمك يا باشا و عادي انا عربيات كتير بتعجبني و طالما العربية كويسة يبقي اكيد هتعجبي.
بالنسبة للجيب احب اقولك ان الشخص الوحيد في عيلتي المكونة من 6 اشخاص اللي عنده سيدان هو ابويا اما الباقي فكلنا جيب او كروس اوفر عشان ابقي دقيق. طبعا العربيات اللي انت سقتها كلها 4X4 من الحجم الكبير و سواقة النوع ده مختلفة تماما عن الصالون بسبب ارتفاعهم عن الطريق و الملفات بيهم لازم تبقي علي سرعات واطية و كلهم مش بتوع جري. اما بالنسبة للباجيرو فانا مختلف معاك تماما و ده عن تجربة العربية من احسن الجيبات. يا راجل ده احنا جبناها 3 مرات سنة 90 و 95 و 2003 و الاخيرة لسة موجودة بس في مصر. اكيد اللي انت سقتها كان فيها مشاكل او ماكنتش مشغل الدفع الرباعي
بالنسبة للكايين من ناحية الملفات فهي احسن من باقي الجيبات لكن مش زي الصالون و ده طبعا لكمية التكنولوجيا اللي فيها. اما من ناحية السحب و الجري فحدث و لا حرج و ربنا يسترها عليا من الكاميرات و انا معايا ال اس و هي 4800 سي سي و 385 حصان و لسة محتكتش بالتوكيل لان اول سيرفس علي 10,000 كيلو
خلاصة الكلام لازم تعرف ان ال4X4 بيفرض علي الواحد اسلوب سواقة معين و ثباتهم مهما كان نوع العربية مش زي السيدان و طالما انت ناوي فهنصحك بواحدة من الاتنين يا طوارق يا مورانو لانهم و عن تجربة ثباتهم و سحبهم حلو و اقرب حاجة للصالون و سعرهم مستعمل معقول. و يا باشا لو عايز تجربهم هما و معاهم الكايين قولي و انا تحت امرك
|
الف شكر يا باشا لردك و اهتمامك و ذوقك العالى
كلامك صح يا باشا بالنسبة للعربيات اللى انا جربتها كلها فعلا محتاجة اسلوب مختلف فى السواقة و يمكن علشان كدة اكتر واحدة عجبتنى كأداء هى أصغرهم (الباثفيندر)
اما بالنسبة للباجيرو يا باشا ربنا يبارك لك فيها بس بصراحة انا سقت الباجيرو موديل 99 و 2004 وو 2006 و 2008 و بصراحة كلهم ماعجبونيش كأداء و راحة و ثبات ... مش عارف يمكن علشان كان بيبقى فيه مقارنة دايما بين سواقتهم و سواقة السيدان ... و عموما يا باشا لولا اختلاف الاذواق لبارت السلع
و ربنا يبارك لك فى الكايين يا باشا و انا عارف كلامك عن السحب و الجرى ... انا معايا حاليا كابريس 2004 و هى 5700 سى سى و 330 حصان و السنة اللى فاتت دافع مخالفات سرعة قد كدة من اول ما بداو يحطو الكاميرات اللى فى عربيات راكنة على جنب الطريق ... و انت ما شاء الله عربيتك اقوى فا بجد ربنا يستر عليك من السرعة و المخالفات
و هى مشكلتى عموما انا انا بدأت فى البلد دى بمرسيدس فا علشان كدة بصراحة بيبقى صعب انى اقتنع بأى عربية تانية مع ان المرسيدس دى كانت 92 بس احسن من الكابريس 2004 فى الثبات و الاعتمادية و انا بجرى كتير عموما علشان كدة تفرق معايا قوى حكاية الثبات دى ... و انا عارف انى بحلم لما بفكر ان فيه عربية جيب ممكن تدينى اداء زى السيدان من ناحية اللعب و الجرى يعنى لأن زى ما حضرتك قلت فعلا الجيب بيفرض عليك اسلوب سواقة مختلف و انا لولا انى محتاج جيب بعد الجواز و الخلف طبعا ماكنتش اتنازلت عن السيدان بس هو الواحد طبعا لازم يجيب العربية اللى تناسب ظروفه مش بس اللى بيحبها و بيرتاح فيها علشان كدة عاوز اجيب اقرب واحدة بين الاتنين.. ده مش ذم فى الجيبات و لا مدح فى السيدان على قد ما هو تعود و راحة نفسية
و انا بجد فعلا الطوارق عاجبانى جدا بس عاوز اسال برده على السيرفيس و قطع الغيار و و حضرتك عارف طبعا ان ده بيكون مهم جدا ما دامت العربية مستعملة
و اخيرا يا باشا الف شكر على دعوتك لتجربة العربيات بجد انا كنت عاوز اجرب الكايين و الطوارق .. و عموما يا باشا انا نازل مصر بإذن الله يوم الخميس بالعربية ... لو عاوز تبعت حاجة تحت امرك
و شكرا ليك مرة تانية