عايز حل ...
انا هاعرض عليك كذا حل ..
مركز اسمه الرضوان في عين شمس ..
في حتة غريبة جدا بس تدخله كأنك دخلت امريكا ..
مركز فيه 100 حضانة ..
متقسمين الى مناطق كل منطقة 4 حضانات مسئول عنهم 2 تمريض و كل 10 حضانات معاهم طبيب مقيم و حسب خبرته يبقى مرتبه ..و كل دور 25 حضانة مسئول عنهم استشاري..
و اليوم فيه سعره ثابت لاي حالة 200 جنيه في اليوم .. شاملة كل حاجة
المركز ده معتمد على نفسه و ميقبلش التبرعات ..
بيلعبوا على مبدأ MASS PRODUCTION
يعني لانه رخيص فهو دايما مليان .. و بيشغلوا هناك حوالي 70 حضانة
و بتبقى مليانة يوميا على فكرة
70 * 200 = 14000 يوميا
عنده 14 ممرضة * 120 يوميا = 1680
و 7 اطباء مقيمين* 250 يوميا = 1750
و هنقول حوالي 100 جنيه اكسجين و مستهلكات و معامل و خلافه ( هما طبعا بيجيبوا الحاجات دي جملة و موش كل حضانة هتستهلك المبلغ ده .. واحدة هتعلى و واحدة هتقل فده هيبقى متوسط ) 100* 70 = 7000 جنيه
كده وصلنا لحوالي 10500 و حط الف جنيه يوميا كهربا و صيانات و عمال امن و نضافة و حسابات و غيره ..
يعني 11500 و في صافي ربح 2500 يوميا يتم توزيعه على الاستشاريين و الاداريين للمكان ..
ده غير العيادة اللي بتجيب يوميا موش اقل 1000 جنيه
يعني لو خدت بالك كله طلع مبسوط..
التمريض هناك بيقبض كويس جدا فبيتفرغ للمكان..
و الدكاترة النواب هناك بتقبض كويس (موش اوي) بس بيتعلموا و ياخدوا خبرة و دي اهم من اي فلوس عند اي طبيب صغير ..
و الاستشاريين هناك بيقبضوا كويس جدا فبيتفرغوا للمكان و لا عيادة كده و لا عيادة كده
و اهم حاجة الناس مبسوطة ..
لانه هناك في سيستم .. و في ادارة
و في صيانة دورية
و في امكانيات ..
و في علم وخبرة بتنتقل من جيل لجيل ..
و السعر ميسر و في متناول معظم الناس ..
ده مثل حي لحاجة بتحصل في بلدنا و بتساعد بشكل جامد في حل المشكلة ..
طب ايه المشاكل ؟؟؟
اقولك ..
طبعا التكلفة الرهيبة لمكان زي ده
التجهيزات الطبية لن تقل عن 2 مليون جنيه ..
ده غير تكلفة المكان اللي لازم يكون واسع جدا ..
ده طبعا غير توافر القوى البشرية ..
و معلومة يعني مندوبين شركات تسفير العمالة المصرية للخارج قاعدين هناك بصفة مستمرة ..
اول ما الدكتور يخلص الماجستير هناك .. ياخدوه فورا على السعودية او الكويت ..
يعني بعد ما يكون اتدرب و خد خبرة جامدة طبيا و علميا ياخدوه هم على الجاهز ..
و تضطر الادارة هناك لاستجلاب نواب صغيرين و تقعد تعلم و تدرب فيهم برده ..
و طبعا .. اي تمريض عنده استعداد يسافر بياخدوه من غير تفكير ..
و اخر مشكلة انه المركز ده لازم برده يبقى حذر جدا في قبول الحالات للحفاظ على ما نسميه احنا
MORTALITY RATE او معدل الوفيات ..دي رعاية مركزة و في اطفال هتموت يعني هتموت .. في حالات الطب مبيقدرش يعملها حاجة ودي ارادة ربنا .. بس مينفعش ازود في استقبال الحالات الحرجة اوي دي و الا هقلبها مقبرة ..
بس تخيل معايا ..
كل المحافظات اللي محرومة دي ..
زي سينا مثلا .. الحضانات فيها تتعد على صوابع ايدك
لو تعمل في كل مدينة مركز زي ده ..
هيحل مشكلة جامدة جدا ..
و ده نموذج لحل جذري.. بس مشكلته في فداحة رأس ماله
و لسه في نماذج تانية ..
و نكمل بعدين..
