المشاركة الأصلية كتبت بواسطة السيد العيسوى
والله الحكومه دى بتجيب حاجات تشغل الناس بيها 000 كان مالها النمر القديمه
ولا هو كتر فلوس |
أولا : النظام ده موجود في كل دول العالم... ما عدا مصر لحد 2008
ثانيا : في كل مكان في الدنيا.. فيه ترقيم إسمه Alfa-numeric يعني ترقيم فيه حروف وأرقام .. وده سببه الرئيسي لما بيكون عندك حاجات عايز ترقمها كتير قوي أكتر من المساحة المحددة ليك في الكتابة أو الخانات العشرية مثلا
ده بيديلك مدى أوسع في الترقيم لإنك بدل ما حترقم بـ10 أرقام بس (0 - 9).. قدامك كل الأبجدية تقدر تستخدمها
واللي بيشتغل في الكمبيوتر عارف الكلام ده
مثلا:
النمر القديمة كانت 6 أرقام بس.. يعني من 0 إلى 999999 (يعني مليون)
ودي بتتحسب بنظام التباديل والتوافيق إنك تضرب 10 (اللي هي عدد الأرقام اللي تقدر تغيرها في الخانة الواحدة) في نفسها 6 مرات (اللي هي عدد الخانات) = 1000000
بنفس الطريقة لو حطينا حروف بدل الأرقام حيبقى عندك 28 حرف بدل 10 أرقام... اضربهم في بعض 6 مرات حتاخد 481890304 (حوالي 481 مليون) مش مليون واحد
هي دي الفكرة أساسا لإن عدد العربيات كتر والطريقة دي حتخلي فيه إمكانية إن النمر تتشاف بوضوح أكبر وتتحفظ أسهل، وكمان تدينا مرونة في تخصيص الأرقام للملاكي والأجرة والنقل على حسب الحاجة الفعلية لكل محافظة وعدد السكان فيها
المشكلة في النظام اللي عاملينه في مصر دلوقتي إنه مش بيستخدم كل الحروف الأبجدية في الترقيم، لإن فيه حروف كتير شبه بعض، زي الـ س ، الـ ش ... بيستخدم الـ س بس عشان المصريين وفهلوتهم طبعا يقوم واحد يحط 3 نقط فوق الـ س تبقى ش وبقت نمرة تانية خالص
وكمان لاغيين الصفر عشان نفس السبب
فكده الحروف بقت 18 بدل 28
المهم...
في القاهرة النظام بيسمح بـ 4251528 نمرة (18×18×18×9×9×9) (حوالي 4 مليون و250 ألف)
في المحافظات الفعلي هما حرفين و4 أرقام لإن الحرف التالت للتمييز
يبقى كل حرف تمييز قدامه 2125764 نمرة (18×18×9×9×9×9) (حوالي 2 مليون و125 ألف)
فاضل الحتة بتاعة ليه بيكتبوا اسم مصر مادام العربية بديهي ماشية في مصر؟؟؟
مصر حالة خاصة إن عربياتها مش بتخرج براها لإن الناس مش متعودة تسافر بالعربيات (إلا في أوتوبيسات العمرة والحج)... بقية دول العالم طبيعي إنك ممكن تسافر بعربيتك بره بلدك... وممكن نمرتك تبقى شبه نمرة عربية تانية في البلد اللي إنت رايحها... فلازم يبقى فيه تمييز... وأنا أعتقد إن النظام ده نتيجة نظام دولي أو اتفاقية عالمية
...