[TheSantos128]

زى اى مواطن عايش فى البلد "اللى كانت عظيمه زمان"..... اتفرجت على الفيديو بتاع القاء القبض على ثلاث بلطجيه ومعهم اسلحه ناريه ..
وزى اى مواطن قعدت امبارح اتفرج على المهازل اللى كان على برامج "الزفت شو"...
مجموعه اشخاص وفى كل برنامج بيكونوا " دكتور-ناشط حقوقى-رجل امن سابق"...كلهم قاعدين بكروشهم المنتفخه والبدل الغاليه بتاعتهم .وساعتهم الرولكس وابتسامه سمجه زيهم ومفيش الا كلمه واحده على لسانهم "العنف غير مبرر-لابد مع التحقيق مع الظباط المشاركين فى "واقعه التعذيب"-نطالب بحبسهم الفورى".
وبصراحه انا كنت بشاهد البرامج دى امبارح وعلى وجهى شبح ابتسامه علشان افتكرت كلمات "الاخ العبيط" معمرالقذافى ..لما كان بيقول بكله ثقه وغضب :من انتم .....
لابجد انتوا مين ,انا اتحدى ان اقل واحد فيكم ساكن فى الزمالك .او بالم هيلز, او حى الاشجار والربوه وغيرها من الاماكن الموجوده جغرافيا "فقط" فى مصر يعنى مش عارف شعور المواطن البسيط اللى ساكن فى حى شعبى او متوسط علشان تحكم على اللى بيخلصو من المجرمين دول ,,يا ايها المنافقون يا من يضع السم فى العسل ..لقد عرفت من انتم ,انتم من تتكلمو من ابراجكم العاليه ووسط حراستكم المشدده ,وتعيشوا داخل مجمعاتكم المحميه ..
وكان اللافت اوى تكرار "التعذيب –العنف"...الفيديو اللى انا شفته مكنش فيه تعذيب .
"زى اللى حصل مع عماد الكبير بتاع بولاق من سنتين ولا كلب قدر يفتح بوقه".....
اللى شفته فى الفيديو هما "ثلاث" مجرمين تم القبض عليهم ,وبعد كده تم سجب واحد منهم خارج الغرفه "علشان اكيد هو اللى سلمهم"...ما علينا ,المهم المجرمين دول تم ضبطهم ومعهم مجموعه اسلحه ناريه ..اول لما وفقفوا على رجليهم الظابط قال كلمه ونفسى الناس تشوف الفيديو تانى :قال السيد المشير والسيد وزير الداخليه بعاتين كل الناس دول علشان يعرفو جبتوا السلاح منين ..يعنى الظابط بدئ اول طرق الاستجواب.. ومن الواضح ان كان كل تركيز الظباط على معرفه مصدر السلاح ... وهنا تم استخدام ما يسمى العنف.....بس الاول ايه هو العنف
العنف: العنف سلوك يؤدي للمس بالاخر. هذا المس يمكن ان يكون جسمانيا او نفسيا, اي ان الضرر الناجم عن اهانة او عن استعمال سيء للقوة, لا يتطرق فقط للضرر نفسه, بل الى تقدير حجم هذا الضرر وما يرمز اليه, وهذا ما يسمى بالعنف السلوكي. "
السؤال هل ما تم فى هذا الفيديو هو احتجاز مجموعه اشخاص وايقاع الضرر الجسدى والنفسى المتعمد بغرض الايذ اء
طبعا لا ..
اللى حصل يا ساده هو قيام الساده ظباط الشرطه والجيش بمجموعه من التدابير العنيفه الغرض منها هى حمل مجموعه من المجرمين شديدى الخطوره على الاعتراف بمصدر تواجد بيع الاسلحه التى من شانها الاضرار بالامن القومى بالبلاد
وتم استخدام هذه التدابير العنيفه لان طبعا اغلب هؤلاء المسجلين والمجرمين بيكونوا على مدار ال24 ساعه تحت تاثير المخدارت فينتفى الشعور بالالم ....
من الاخر بيكون مبرشم ولو ضربته من هنا لبكره مش هيحس.
انا بناشد السيد وزير الداخيله والسيد المشير بعدم فتح التحقيق مع هؤلاء الظباط الشرفاء
وياريت الساده اللى لاجئين داخل استوديوهات الفضائيات واللى بيحطوا لانفسم "تيتل" ناشط حقوقى –ناشط سياسى –خبير استراتيجى....اتقوا الله واحترموا نفسكم علشان لو الظباط دول اتحقق معاهم مفيش ظابط بعد كده هيعرف يقبض على مجرم .... "على كده لو الظابط بعد كده قبض على واحد يقعدوا فى كوستا ولا سلنترو علشان يحقق معاه"
وفى الاخر احب ااكد على حاجتين :العنف مش كل حاجه ومش هو اللى عايزنه يكون نظام حياتنا ,بس مصر بتمر بظروف صعبه علشان كده لازم نستخدم القبضه الحديديه ..
ثانيا : ياريت نفكر كده لو كان ظابط من ظباط "موقعه الفيديو" استشهد اثناء القبض على هؤلاء المجرمين ..ياترى كنا هنقول عليه ايه؟؟؟؟