[تامر ديزل]

سلامو عليكم
ردا على استفسارات الزملاء الاعزاء
د نوح بيسأل عن جرار 8 و10 و12 طيب ماتيجي الاول نعرف الفرق بين الجرار والتريللا لحد مانوصل لاجابة السؤال بتاعك
الصورة الجايه دي تريللا بمقطورتها

والصورة دي جرار بمقطورته

زي ماهوا واضح من الصورتين ان التريللا جزئين الراس والديل ... الراس اللي قدام مافيهاش مكان للبضاعه خالص البضاعه كلها بتتحط ف الديل
انما الجرار الجزئين بتوعه عباره عن الجرار اللي قدام وده على ظهره مكان لتحميل البضاعه ومنفصل عنه المقطوره اللي بتحمل حموله اضافيه
وعشان نفهم الفرق اكتر هنتخيل ان الاتنين عطلوا على الطريق وعليهم حمولتهم عطل مثلا ف الموتور وما ينفعش يتصلح على الطريق ميزة التريللا اننا نقدر نسحب التريللا من تحت الديل وندخل تريللا تانيه تاخد الحموله وتسافر ونسحب التريللا العطلانه للورشه
الجرار لأ محتاج جرار يشد الجرار اللي قدام ويوصله لمكان تعتيق البضاعه وجرار تاني يشد المقطوره ويوصلها لنفس المكان
الصورتين دول بيوضحوا ازاي بنفصل الديل لوحده ومكان اتصال الديل بالتريللا

ادي الديل لوحده اهه واقف على رجليه والتريللا واقفه اهه هتدخل تشده عن طريق الصينيه بتاعتها اللي هيا الحته السودا المدوره اللي فوق الشاسيه ورا

طيب لما التريللا عمليه اكتر من الجرار ليه الاهالي اللي هما مش الشركات كانوا دايما ميالين للجرارات مش للتريللات اقولك سبب بسيط ان القطعه الاماميه من الجرار ممكن استخدمها لوحده للحموله يعني نص حموله لما يكون الحموله بسيطه واوفر كاوتش وسولار هيروح لما اشغل الاتنين مع بعض على الحموله الصغيره
طيب ليه الحكومه عايزه توقف الجرارات وتشغل التريللات اقولك شوف الصورة دي

ده مكان اتصال الجرار بمقطورته واسمه الهوك وبيعتمد الاتصال بين الاتنين على حاجه اسمها بنز حاجه زي المسمار بس تخانتها حوالي 4 سم .. المسمار ده هوا الرابط بين الجرار ومقطورته فقط لاغير ومن هنا بتحصل المشاكل ان المسمار ده لو مش متامن صح ممكن يملص يعني يفلت من مكانه وتلاقي المقطوره ماشيه مع نفسها وممكن تعمل كارثه لا قدر الله
طولت عليكم شويه
ياللا معلش بس اتمنى تكون معلومات تفيدكم وتقربكم شويه للمجال المهم ده والغير معروف بالنسبه لكتير من الزملاء
سلامو عليكم