المشاركة الأصلية كتبت بواسطة mf86
كلام زي الفل بس فين المستندات
|
المفروض ان انا كمواطن مصري اروح اتطقس على العنوان المذكور و اروح الشهر العقاري بصفتي الرسمية ( مواطن مصري ) و اطالب بانهم يطلعوا اوراق الشركة عندهم بموجب رقم البطاقة الضريبية و السجل التجاري - و طبعا بتوع مصلحة الضرائب و الشهر العقاري حيستخرجولي كل الاوراق و المستندات اللازمة فور ان اثبت لهم هويتي اني مواطن مصري ببطاقة الرقم القومي بتاعتي و بعدين اخذ الاوراق دي و اطلع على مقر الشركة نفسة اللي عليها حراسة مشددة و اول ما الحرس المسلحين يشوف اثبات هويتي اني مواطن مصري حيسمحولي بالدخول فورا و اطلاعي على كافة اوراق الشركة و حساباتها و اجمالي الوارد و الصادر و المصروفات مش كده؟
و بعدين اخد صور من الكلام ده كله و اشبك في ايدي 3 او 4 شهود و اطلع على النيابة.... و اللا اقولك - نيابة ليه ما اطلع على المحكمة علطول و ادعي على مؤسسي الشركة بصفتي و شخصي مواطن مصري ينوب عن الشعب و بعدين زي ما ريحت ضباط التحريات و النيابة و هما قاعدين في بيوتهم بيشربوا شاي بالياسمين اخللي القاضي قاعد في بيته كمان و اطلع على المنصة و بموجب الشهود اللي انا جايبهم و الورق اللي حصلت عليه بصفتي القانونية احكم انا برضة باسم الشعب (بصفتي اني عضو منه و انوب عنه ) عليهم بالحبس بموجب القانون على الفساد و غسيل الاموال و بعدين اخد كام واحد معايا من الشعب برضه و بصفتي كمواطن مصري القي القبض عليهم مدنيا و اسلمهم للسجن و اديني ريحت شرطة التنفيذ
و بالمرة نريح المأمور و حرس السجن من وجع الراس و اجيب كام غفير على رجالة مواطنين مصريين برضه لحراسة الحرامية دول
ايه رايك؟ ما هو طالما مباحث الاموال و المباحث الجنائية مش عارفة تشوف شغلها و ما دام وكلاء النيابة و النائب العام مش فاضي يشوف شغله و ما دام القضاه مش فاضيين و القضية معاهم بتاخد بالسنة و السنتين و ال خمسة كمان في القضايا المدنية و ما دام بتوع تنفيذ الاحكام نايميين في الاقسام و مبيخرجوش الا لو اتظرفوا صح و ما دام بتوع السجن عاملين 5 نجوم للباشاوات و مبارك رايح جاي بالتريننج سوت و الهليكوبتر لزوم الفسحة يبقى احنا اللي نريح الباشاوات و يقعدوا في بيوتهم عند امهاتهم و احنا بقى ساعتها بسيب اشغالنا و مصالحنا و نشوف شغلهم و ناخد حقنا بايدينا
عرفت ليه في موضوع سابق قلتلك الداخلية عايزة تتغير كلها؟