[vertical.horizon]

السلام عليكم، أتمنى من الأساتذة الأفاضل مساعدتي من واقع خبراتهم الكبيرة في المجال ده وأكون ممتن لكم جميعا. أنا اشتريت عربية والمفروض أروح أرخصها بكرة الصبح، ودي أول مرة أعمل كدة في مصر ومش عارف الحقيقة أعمل إيه بالظبط أو إيه اللي أتوقعه في قسم تراخيص العربيات. هي عربية من التوكيل يعني مش نقل ملكية وكاش مش أقساط، أنا لسة المفروض هاستلم الورق من التوكيل بكرة وانا هاستلم العربية وامضي على الإستلام واخدها على قسم التراخيص (ده حسب كلام التوكيل) ومش عارف إذا كان في أي أمور لازم أعملها أو أعرفها قبل ما أروح قسم التراخيص. أنا كلمت أحد الأساتذة أعضاء المنتدى في شركة مصر للتأمين عشان أعمل تأمين للعربية فلو فيه أي اقتراحات بالنسبة للتأمين أكون برضة ممتن لكم. إيه اللي أعمله لما أوصل قسم التراخيص، الفورمات المطلوبة، أتجه ناحية أي قسم بالظبط؟ أي معلومات تفيدني أكون شاكر لكم. على فكرة أنا امبارح رحت قسم المرور وبدلت رخصة القيادة بتاعتي الكويتية (أنا مصري مش كويتي) برخصة قيادة مصرية، الموضوع كله خد حوالي 20 دقيقة وكان الراجل اللي هناك في منتهى التعاون وزي العسل (ربنا يكرمه).

شاكر لكم سلفا مروركم الكريم..

تحياتي..