رد: توهان فى دنيا النسيان
-6-
نظر اليه والده فى غضب وعصبية وقال:
-انت انسان فاشل ومش ح تنفع فى اى حاجة00
أطرق توهان برأسه قبل ان يتبع والده:
-بص آخر فرصة ليك ف البيت 00
انا كلمت عمك توفيق تشتغل معاه على عربيته ولو مسديتش نشفوفش وشك!
زفر توهان بضيق بالغ 00
فى الآخر ترسى على توفيق أرخم بنى آدم عرفه!
استحمل يا توهان يمكن تكون بداية طريق المجد!
وفى اول يوم حمل السيارة باقفاص الفاكهة وركب مهدودا الى جانب العم توفيق وبعد مضى ساعة فى الطريق وتوفيق لا يكف عن الحديث 00حديث سمج لا يخرج عن المواعظ والارشادات التى تقال للاطفال00 وعن شكوى والده منه00وكيف انه انسان متبلد يحب النوم والكسل والاكل !
كان الرجل سمجا وحشريا !
توقف توفيق ونزل من السيارة ليضرب حجر معسل وكوب شاى00
جلس امامه توهان فى ضيق والرجل يشفط الدخان كالبالوعة ويزفرة فى بطء شديد00دفقة من الفم وأخرى من الانف ثم يرشف شفطة من كوب الشاى ترتج لها المنضدة!
قال الرجل وهويدفق الدخان فى وجه توهان:
-تعرف ياواد ياتوهان انك حمار
-انا ياعم توفيق؟
-وحمار كبير كمان
-ليه؟
-انت مخلص جامعة من امتى؟
-بقالى تلت سنين
-عملت فيهم ايه غير الصرمحة والقعدة على القهاوى
-انا كنت لاقيت شغل وقلت لا
-الشغل كتير00كان زمان معاك دلوقتى قرشين حلوين كنت سافرت بيهم بره واتنغنغت
وشعشعت الفكرة فى رأس توهان وألحت عليه00
نعم انه السفر 00ياسلام!
لو اوروبا!
بيضة ذهب 00
يرجع من هناك باليورو زكايب ويصبح رجل اعمال وهذا يعطيه الاولوية ليحقق حلمه فى ان يكون وزير!
غرق فى أحلامه قبل ان يوقظه توفيق بصوته الاجش00
وانطلقا مرة اخرى فى طريقهما الطويل00
قال توفيق:
-انت لازم تتعلم السواقة00عشان تساعدنى فى المشاوير الطويلة
-انا بسوق بس على بسيط
-حلو 00يعنى كام طلعة تدريب وتبقى بريمو
-ياريت ياعم توفيق00ايدى على كتفك
-من بكره بعد الشغل 00تاخد لفه
سرّ توهان بالفكرة فمن الممكن ان يصبح سائق وهذا يعطيه فرصة لجمع مبلغ اكبر وفى وقت أقصر ليحقق حلم السفر الذى أصبح لا يتمنى شىء سواه
تتبع
__________________
|