[wawoo]

طبعا اكيد معظمكو تابع ان تى اى داتا ضاعفت السرعات و ذلك مقابل نفس السعر فى السرعات غير محدودة .

جميل قوى نفس الفلوس و السرعة بقيت الضعف , طيب فين الانة , الانة يا سيدى انك عشان تاخد السرعة الجديدة لازم تعمل فاتورة جديدة ,
يعنى اية فتورة جديدة , يعنى انت لو دفعت شهر او شهرين او ثلاثة مقدم بالسرعة القديمة , لازم تتدفع تانى اى فلوس عشان تاخد التعديل للسرعة الجديدة , و مقابل الفلوس دى حتاخد كام يوم زيادة بعد ما يرحلو تاريخ الفتورة كام يوم .

انا مش فاهم اية علاقة الفاتورة بالسرعة الجديدة , لية ما يغيروش السرعة على طول من غير فواتير جديدة و خلاص .

يعنى انا افهم مثلا انة يكون فى فاتورة جديدة لو انك حتغير لسرعة جديدة انت مش دافع ثمنها .

و الغريب بقى و دة اللى يوريك ان فى خيار و فقوس فى الشركة دى , ان فى مشتركين تم فعلا زياة السرعات بتاعتهم من غير فاتورة جديدة ولا يحزنون , حتقلى ازى ,حقولك هو دة اللى حصل مع المشتركين عن طريق الموزعين , انما المشتركين مع الشركة الام لازم يعملو فاتور جديدة ,

عجيبة يعنى الشركة تقدر اهه تغير السرعات من غير فواتير جديدة , لية بقى تتعب الناس و تحيرهم , عشان كام جنية عاوزين يكسبوهم .

المهم بقى الفتورة الجديدة دى حتدفع فيها تمن نص شهر و حتاخد فقط 10 ايام , يعنى فى كمان سبوبة فى الموضوع دة غير ان الفاتورة معدها حيكون فى وسط الشهر , يعنى حتلخبط نظام الفواتير بتاعك كلة .

طبي واحد يقولى لية تى اى دات نزلت العرض دة فى اول اسبوع من الشهر , لية منزلش مع اول الشهر عشان اللى عاوز يجدد او يغير للسرعة الجديدة يغير على طول من غير فاتورة جديدة .

الاجابة بسيطة . هما عوزين يلمو اى فلوس من موضوع تغير السرعة دة , عشان يبقو عملو اى سبوبة بدل ما الموضوع يعدى كدة ببلاش من غير اى سبوبة .

ياريت جميع المشتركين اللى لم يتم تغير سرعاتهم , يكلمو خدمة العملاء زى ما انا عملت كدة , و يطلبو بتغير السرعة من غير فواتير جديدة .

اسعار الانترنت فى مصر كانت غالية جدا مقارنة باغنى دول العالم , وهو دة سبب نزول السعر , مش تفضل من تى اى داتا و لا مصرية للاتصلات زى ما الناس فاهمة .

يبقى يغيرو السرعات للناس من غير لف ولا دوران , و خصوصا انهم عملو كدة بالفعل مع بعض المشتركين