[تامر ديزل]

قبل حادثة تصادم بيومي مع الحيطه ام شنب بساعه وفي مكتب غير معلوم في مبني غير معلوم تابع لقطاع الامن الوطني (امن الدوله سابقا ) كان الحيطه واقف بياخد تعليمات من سعات الباشا
- روح هاتلي بيومي ده وتعالى
- ولا مؤاخذه سعاتك هوا بيومي ده اخوان ولا شيوعي
- وهيا تفرق في ايه روح هاته وتعالا ما صدقنا يجيلنا شغل هاننقي ؟
- لأ سعاتك بس اصل كل واحد منهم ليه مسكه ده مسكته غير ده
- بيومي ده لا ده ولا ده راجل عادي
- ااااه مواطن يعني سعاتك خمس دقايق ويكون هنا سعاتك
وبعد شويه في نفس المكتب كان بيومي واقف قدام سعات الباشا ووراه نفس الحيطه ام شنب اللي خبط فيها وهوا داخل العماره
- قولي يابيومي زكي صاحبك من زمان
- زكي تاني ؟؟؟؟؟؟؟؟؟؟
- الحيطه : (قفا ) رد عدل على سعات الباشا
- متربيين مع بعض ياباشا
- وهوه فين دلوقتي
- والله ماعرف سيادتك
- الحيطه : قفا
بيومي : يترجرج من القفا
الباشا : افتكر يااخي
بيومي : والله العظيم ماعرف
الحيطه : قفا
بيومي : ياباشا والله العظيم انا نزلته ع الشط وروحت اجيب العربيه ورجعتله مالقيتوشو الله العظيم مالقيتوش
الحيطه : قفا
بيومي : ابوس رجلك ياباشا بلاش بهدله انا هاخبيه ليه بس هاخبيه ليه هاعمل بيه ايه
الحيطه : قفا
يتبع ...........