المشاركة الأصلية كتبت بواسطة asom_6
الحقيقة انا ظروفى كانت شبه ظروفك بالظبط , وبعد ما لفيت شوية عالبنوك المختلفة استقريت فى النهاية على بنك ناصر الاجتماعى لعدة اسباب :-
1- الفايدة فى بنك ناصر 6% بس ولكن باقى البنوك من 9 الى 10 %
2- التأمين على السيارة موش اجبارى ومن حقك تأمن او متأمنش براحتك البنك لا يلزمك فى هذه النقطة
3- كل المبلغ اللى كان متوفر معايا كان حوالى 40000 بس ودا كان هيبقى مقدم فى اى بنك اخر لكن فى بنك ناصر حطيت مبلغ 30000 وديعة لمدة خمس سنوات (مدة الاقساط) ودفعت مقدم 10500 والباقى على خمس سنوات والقسط الشهرى 1300 جنية بعد حساب 6% فائدة سنوية لكل سنة (مدة التقسيط حتى 7.5 سنوات بحد اقصى) بس خد بالك ان الوديعة كمان بتحقق فايدة سنوية 10% تقريبا ,يعنى فى النهاية فايدة القرض مع فايدة الوديعة بيلاشو بعض وبتكتتشف انك بعد مدة السداد دفعت فقط تمن العربية الاصلى بدون فوايد --- يعنى اشتريت عربية زيرو بنفس تمنها وبالتقسيط --- وبنفس المبلغ اللى كنت هتدفعه مقدم لبنك تانى
4- لا يوجد شيكات او ضمانات من اى نوع وانما هى الوديعة وبس ضمان العربية بجانب الحظر طبعاً المكتوب فى الرخصة ويجدد سنويا بخطاب من الفرع اللى مقسط منه بدون انتظار وانت واقف المهم تنتظم فى السداد.
5- سداد الاقساط شهريا فى الشباك لغاية يوم 15 فى الشهر بدون فوائد وبعد يوم 15 تطبق غرامة 1.5% يعنى بتاع 15-20 جنية باقى البنوك من يوم 2-3 فى الشهر تبدأ الاتصالات والرخامة وفين القسط يا استاذ
دى يا باشا باختصار تجربتى مع بنك ناصر والحمد لله استلمت العربية فى خلال 10 ايام والورق المطلوب كان صورة بطاقة ووصل مرافق ولا تحويل مرتب ولا مفردات ولا حتى استعلام بالبيت .... وعلى فكرة فيه ميزة مهمة كمان ان البنك هو اللى بيشترى العربية باسمه ويبعهالك بالتقسيط يعنى الموضوع مش قرض وفايدة لأ سلعة بالتقسيط .
على فكرة العربية شيفرولية لانوس 2011 كاملة واخترتها بعد حيرة كبيرة بينها وبين الفيرنا والكيا ريو واللوجان ... وعلى فكرة الزيرو زيرو وكل معارفى اللى اشتروا مستعمل بيعانو من المصاربف الخفية للمستعمل والعيوب المحيرة التى تظهر فجأة بالعربية واللى مبيكونش عارفها غير صاحبها وطبعاً مابيقولش عليها واللانوس دى كانت اول عربية ليا وفى الاول كنت هايبها جدا وخايف عليها من ركنتها فى الشارع ونفسى اعرف اطلعها الشقة فوق تنام معاناً لغاية متعودت عليها خلاص وبقيت باسوقها بقلب جامد فى الشارع ومبقلقش عليها بس لازم اغطيها كويس علشان متبردش .. قصدى علشان متتجرحش
نصيحتى ليك اشترى لانوس ... اشترى زيرو ... اشترى من بنك ناصر ... وأمن على العربية ياريت
|
هوة ياباشا بجد موضوع جامد جدا بس ممكن يكون 43 الف كتير شوية عليا الوقتى يعنى كقيمة وديعة + مقدم عربية لانى هادفع 38500 بالعافية وبعدين القسط كتير بردة شوية عليا 1300 + كمان انا ناوى اكيش ان شاء الله اخر اربع سنين عشان ارتاح فعلا بس مش الوقتى لانى ممكن اكون مزنوق شوية السنة دى والفترة دى لكن بالنسبة ليا انا عاوز ادفع قسط قليل شوية عشان اقدر اكيش الباقى ان شاء الله بدون مقاطعة على اخر السنة عشان اخلص بجد بس هوة حوار من الاخر جامد يعنى بس لظروفى صعبة كمان شروط بنك ناصر شوية مجحفة ومقرفة وشكرا اوى على مساعتدك ليا بجد المهم هيا الانوس لونها اية وعاملة معاك اية بجد ؟