[فادى]

انا هقتبس من رد سابق ليا على موضوع الهزيمة من زامبيا :

و الله احنا عندنا مشكلة كبيرة جدا اسمها الاحتراف فى الخارج, الدورى عندنا منظم و قوى بيطلع لعيبة كويسة خاصة من الأهلى, يروح مدرب المنتخب واخدهم و يكسب بيهم بطولة أفريقية, و ده اللى حصل فى 2006, و 2008, الباشوات يحترفوا بعديها, كل واحد يروحلى فى نادى فى مؤخرة الدورى الانجليزى, و واحد فى نادى فى مؤخرة الدورى الألمانى, و نقول عليهم محترفين لأن قناة مش عارف ايه فى انجلترا (اللى هى غالبا خاصة بقرية انجيليزية صغيرة) قالت عليه ده كويس, مع ان أى فريق من اللى بيلعب فيه المحترفين بتوعنا ممكن لو لعب ادام الأهلى يلبس بالخمسة و الستة, أنا متأكد انو ويجان لن يصمد كثيرا امام هجوم مش هقول الأهلى, ادام انبى أو حتى غزل المحلة. لكن المهم انو البيه محترف فى اقوى دورى فى العالم, على منطق ديل اسد و لا راس كلب! طبعا كل هؤلاء بينخفض مستواهم من مباراة لأخرى, لأنهم بيلعبوا فى فرق درجة تالتة, و عشان كده شفنا عمرو زكى تايه طول المباراة باستثناء الهدف, و عماد متعب خيال مأتة, أما زيدان و ميدو فحدث و لا حرج, تطويح فى اى حتة, بيجروا ورا الكورة و لا يحصلوا عليها ابدا. لكن طبعا الكابتن حسن شحاتة مش مركز غير فى انو ياخد اللعيبة من الأهلى و يسربهم على برا, و ادى النتيجة. بصراحة يجب استبعاد كل المحترفين من التشكيل, عاوزين منتخب محلى مكون من لعيبة الأهلى, و مطعم بالنذر القليل من الأندية الأخرى, و الا فما حدث سوف يتكرر. يا ريت نقفل باب الاحتراف شوية و هاتولى لعيب واحد احترف و ارتفع مستواه, كل اللى بيحترف بيخش فى غياهب النسيان, و حسنا فعل جوزيه عندما نصح أبو تريكة برفض عرض نادى رنجرز الانجليزى, جوزيه قالوا نادى رينجرز ضعيف و غالبا هينزل الدرجة التانية, و لو رحت هناك هتتنسى. لو استمر حسن شحاتة فى تسريب اللعيبة الى الخارج, و محاربة الأهلى بحكم تعصبه الزملكاوى, فنعم, النتيجة سوف تكون أسوأ.

و لحد دلوقتى مش فاهم, ازاى يلاعب شوقى و عمرو زكى و زيدان و هم لا يلعبون مطلقا فى أنديتهم الأساسية, حسن شحاتة كان لك همه يطلع اللعيبة على بره و يهربهم من الأهلى و أدى النتيجة, اللعيبة اللى احترفوا فسد مستواهم نتيجة لوجودهم فى فرق ضعيفة لا تمتلك قدرات فنية جيدة, و لا منهج تدريبى محترف مثل الاهلى, و كانت النتيجة انخفاض مستواهم, و مع الأضواء و ال"فساد" الغربى, لم يتحمل هؤلاء اللاعبين الضغوط, و دخلوا فى متاهة الى ان اصبح مستواهم لا يؤهلهم حتى للعب فى انديتهم الضعيفة التى تقبع فى مؤخرة الدورى الانجليزى و الالمانى!
يعنى واحد مش مؤهل انو يلعب فى نادى مؤخرة الدورى الانجليزى, ازاى بالله عليكم يلعب فى منتخب بطل افريقيا عاوز يخش كاس عالم؟!!