المشاركة الأصلية كتبت بواسطة mar mar
للي اول مره يتعلموا السواقه الاحسن انهم يتعلموا علي عربيه تقيله
علشان يعرفوا يتحكموا في العربيه لان العربيه التقيله مش سريعه الاستجابه زي الجديده اللي لو ايدك اترعشنت العربيه تحود منك اعتقد من هنا جت كلمه ان العربيه التقيله احسن
|
الموضوع هنا مش عربية تقيلة... إنما موتور ضعيف
إزاي؟؟
يعني لو موتور العربية بيطلع قدرة حصانية قليلة مش حيقدر يحرك العربية بسهولة حتى لو كانت خفيفة
(أيه اللخبطة دي؟؟؟ إنت مش بتقول العربية الخفيفة بتتحرك بسهولة؟؟؟)
أكيد طبعا... العربية الخفيفة مش بتحتاج موتور قوي عشان يحركها بسهولة... بس لو كان الموتور أصلا ضعيف.. ممكن كمان العربية الخفيفة دي تبقى تقيلة عليه
مثلا... الفيات 126 وزنها 500 كجم (مفيش أخف من كده !!)... وفيها موتور 650 سي سي 2 سلندر وأقصى قدرة بيطلعها حوالي 20 حصان على ما أذكر... العربية خفيفة جدا وممكن أي واحد يزقها بسهولة... بس الموتور يدوب بيخليها تجيب الـ100 كم/س
لو قارنا الكلام ده بالدايهاتسو كوبن اللي اتكلمت عليها.. الفرق حيبان
مثل تاني (إن شالله ما حد حوش
) :
لو عربيتك عطلانة.. وعايزة تزقيها... لو لوحدك مش حتعرفي.. لو حد تاني حيزقها معاكي حيبقى الموضوع أسهل (ده لو ما سبتيهوش وقعدتي تتفرجي عليه بيزقها لوحده
).. وطبعا كل ما كان فيه ناس أكتر بتزق العربية حتتحرك بسهولة وبسرعة أكبر
اللي بنتكلم عليه ده إسمه... نسبة القدرة للوزن Power to Weight Ratio
يعني كل حصان نصيبه كام كيلو من وزن العربية
على سبيل المثال:
الهيونداي إيلانترا 2012... وزنها حوالي 1250 كجم في المتوسط... وموتورها أقصى قدرة بيطلعها حوالي 138 حصان
يبقى كل حصان شايل (1250/138) = حوالي 9 كجم لكل حصان
قارني النسبة دي بنسبة الفيات 126... حتلاقيها 25 كجم لكل حصان
الكلام ده واضح جدا في عربية زي الفيرنا لإن نسبة القدرة للوزن أقل بكتير، عشان كده الناس بتشتكي إنها بتجري وإن الموتور أكبر بكتير من العربية
...