[dr_eslam_66]

أحلى وقت بيني وبين عربيتي لما أكون ماشي في مشوار سفر على طريق سريع ومشغل أي أغاني أم كلثوم أو نجاة ولا عبد الحليم وأبقى ماشي في حارة في النص يادوبك بسرعة الطريق أو أعلى 10 (المهم اكون تحت سرعة الرادار) علشان ما أركزشي إطلاقا في أي حاجة غير إني ادندن مع الكاسيت وبس.
لاكن لما ببقى سايق جوا البلد بقى ببقى مشغل أي أغاني وبالذات ريمكسات جاز أو ساعات بتضرب معايا وبتقلب راب وتلاقيني في المشوار الواحد واخدلي شتايم في جنابي تكفيني سنة من كتر مارخمت على الناس (غير مسموح بالمرة لأي عربية تعديني لا من اليمين ولا من الشمال) غير لو كان إستأذن مني أو كنت بتكلم في التليفون مثلا وماليش نفس أخنق على حد أو لو معايا حد في العربية من كتر ما أعصابه سابت عايز يفتح الباب وينط فا مابرضاش أتعب أعصابه أكتر من كدة.
وجوا البلد دا بيبقى أسوأ وقت أسوق فيه عربيتي وبكره السواقة بسبب أعصابي المشدودة ونرفزتي الي على الفاضية والمليانة وربنا يستر بقى.