[dr_eslam_66]

أول عربية سوقتها كانت 128 بتاعت صاحب بابا وكان متراهن هوا وبابا إنو هيخليني أسوق العربية في ظرف يوم واحد وكنت وقتها في أولى ثانوي وطبعا طلعت عينة لدرجة إنه إتعصب عليا وقالي الظاهر إني راهنت على عيل بس في آخر اليوم لاقيت نفسي داخل شارعنا بيه وأنا الي سايق وبابا لما شافني ماكانشي مصدق إنه هيدفع الرهان وكان متغاظ قوي.
ودا طبعا كان بسبب مشكلة بيني وبين بابا إنه ماكانشي راضي يخليني أسوق عربيته ولما زعلنا مع بعض كه عموا نفادي (أيوة هوا إسمه كدة) يصالحنا ويحل المشكلة.
بس ومن ساعتها وأنا بدأت آخد الشاهين وطبعا الأمر مايخلاش من شوية خبطات وتجريحات بسيطة.
بعد ما خلصت الثانوية إشتريت إكسيل وبعدين فليشيا وبعديهم 128 وبعدين سافرت وبرة إشتريت ماتريكس وإتدمرت خالص في حادثة ووراها سيفيك ومعايا حاليا كرولا برا مصر وصني في مصر.
ومش هقول بعد العربيات دي كلها أحلى عربية سوقتها هيا الشاهين بتاعت بابا لأنها كانت حلم بالنسبالي لفترة كبيرة قوي.