الله عليكي يا بشمهندسه حضرتك بس ذكرتي كام مصيبة من مصايبهم طيب يا جماعه تعالو نحسبها

مين اللي بيعين رئيس الوزراء مش حسني بردك

طيب مين اللي بيعين الوزراء مش رئيس الوزراء اللي حسني بيه عينه

طيب تعالو نمسكها وزاره وزاره ونشوف احنا جنينا ايه من الوزارات ديه

انا بس هقول مقتطفات اللي ظاهره زي عين الشمس للجميع

اولا : وزارة الاسكان : طبعا حدث ولا حرج قانون قديم ذهب مع الريح اقل شقه دلوقتي وصلت ل 200 الف مشروع ابني بيتك وقمة النصب اللي فيه وانا ليا واحد زميلي كان واخد حتة ارض في المشروع ده وما صدق خلص منها وباعها

ولا موضوع تخصيص الاراضي لحيتان البلد وتسقيعها وبيعها بالملايين ده نسميه ايه

ثانيا : وزارة الصحه : تقدر تقولي العلاج علي نفقة الدولة كان بيروح لمين بالظبط وموضوع العلاج علي نفقة الدولة ديه نقطة في بحر الفساد لما بطرس بيه يطلع مراته علي نفقة الدولة وهو كمان يطلع يتعالج وناس مش لاقيه تمن اللقمه بتموت في المستشفيات ولا الجبلي صاحب دار الفؤاد لما يطلع يتعالج علي نفقة الدولة ده يبقي اسمه ايه


ثالثا : وزارة الداخلية : وما ادراك والداخليه واللي بيحصل فيها من مجاملات في القضايا والحملات ومجاملة اصحاب النفوذ ده البانجو ياللي بدافعلي عن حسني كان بيتباع من قسم الشرطة عايز ايه اكتر من كدا

رابعا : وزارة السياحة: وطبعا والكل يشهد فرق المعاملة بين المصري والسايح في البلد لما الواحد مننا يحاول يدخل شرم كان يتفتش ولاكأنه داخل اسرائيل والمزارات السياحية وخد عندك الهدايا القيمة اللي كانت بتطلع من المقابر الفرعونية وتتقدم لمدام حسني علي طبق من ذهب ولا شركات الغوص اللي اتقفلت كلها واحتكرها اخو زهير بيه جرانه

خامسا : وزارة البيئة : وديه لوحدها مصيبة كبري تعالو شوفو المصانع اللي بترمي بلاويها في مية النيل ولا الميكروباصات اللي بطلع علينا زفت واحنا ماشيين ولا حرق قش الرز ولا ولا هقول ايه ولاايه

سادسا: وزارة الزراعه : وتعالو نشوف الاراضي الزراعيه اللي بتدخل كردون مباني ومساحة الرقعه الزراعية اللي كل سنة بتقل عن اللي قبلها

سابعا : وزارة العدل : اللي مفيهاش ريحة العدل اللي في الدنيا والقضايا اللي بتطرمخ واللي بتقعد بال 20 سنة علي مايتحكم فيها والاحكام اللي مبيتنفذش منها اي حاجه علي اي حد واصل في البلد

ثامنا : وزارة القوي العاملة : وتعالو نشوف معاناة الناس اللي بتكح تراب جوا البلد والناس اللي بيتمسح بكرمتها الارض بره البلد والمصانع اللي بتتخصص وتتقفل والعمال اللي بتتشرد وتترمي في الشوارع

تاسعا : وزارة التربية والتعليم : ههههههههههههههه ونعم التعليم فعلا ده احنا وصلنا للعالمية بصحيح

عاشرا : وزارة التعليم العالي : حتي جامعه القاهرة خرجت من تصنيف احسن 500 جامعه علي مستوي العالم ونعم الفضايح والمنهج اللي متغيرش من 50 سنة ولنا الله

الحادي عشر : وزارة النقل و المواصلات : وتعالو نشوف جمال الشوارع والطرق والكباري والقطارات اللي بتتحرق باللي فيها والعبارات اللي بتغرق باللي فيها قمة الضمير في الوزارة ديه بصراحه

الثاني عشر : وزارة المالية : يوسف بيه اللي خربها وقعد علي تلها اللي خلي الناس ماشيه في الشارع تكلم نفسها زي المجانين ومخلاش حد في مصر الا لما خلاه مديون وحسبي الله ونعم الوكيل فيه

الثالثه عشر: وزارة الاعلام : طبعا اعلام الريس وحرمه واولاده فقط لاغير

الرابعة عشر : وزارة التجارة والصناعة : ديه حط قدمها كلمة الراعي الرسمي للاحتكار في مصر

الخامسة عشر : وزارة البترول : والصفقات المشبوهه وبيع الغاز بتراب الفلوس

كفايا عليكم كدا لحسن تعبت

هاتولي انتوا وزارة عملة حاجه للبلد ديه