[تامر ديزل]

كل واحد مسئول عن ادارة عمل ما او شركه او مصنع او دكان وكل من هو مدير مدعو للدردشة في ما يخص فن الادارة والمواقف اللي بيتعرض ليها وازاي بيحلها وكمان المدارين (بضم الميم ) مدعوين يقولوا رأيهم في مديرينهم
اللي خلاني اعمل الموضوع ده هوا اجتماع مجلس ادارة الشركة اللي بشتغل فيها النهارده والتعليق الظريف اللي قاله زميلي في مجلس الادارة بعد الاجتماع وهخلي التعليق للاخر
مجلس الادارة مكون من رئيس واعضاء والاجتماعات بتكون دايما كالتالي : رئيس المجلس بياخد 95 % من وقت الاجتماع يمسكنا كلنا يواجهنا باخطائنا في اداراتنا وال5 % الباقية بيتكلم فيها النائب وال7 اعضاء وباقي المديرين وطبعا بيكون لينا مشاركات مؤثرة زي مثلا: تمام / كلام سيادتك مظبوط / فعلا فيه تقصير / حاضر تمام
المهم النهارده كان الاجتماع عاصف وكل واحد فينا خد اللي فيه النصيب سبعات وتمانيات وخصم وجزاءات وما كانش ناقص غير تشتي علينا واحنا قاعدين
نزلنا من الاجتماع مبوزين مسودين قابلنا مدير زميلنا بس مش عضو في المجلس وغير مدعو سأل : ايه الاخبار رد الاستاذ محمد : النهارده كان كله ضرب ما كانش فيه شتيمه
طبعا دي بداية كلام في الموضوع ولسه الايام جايه ناخد وندي وقصدت ابتدي بمشاركه خفيفه وقصيرة ومش في عمق الموضوع عشان اسيب الموضوع مفتوح اللي عنده اي حاجه يقولها وعشان المشاركات الطويله محدش بيقراها