رد: تجربتي بعد الثورة لتجديد رخصة القيادة الخاصة! معاناة و مأساه!
فقمت بسؤال الموظفة في عين الصيرة عن شهادة البيانات
بنفس النظرة الاحترافية السريعة على الرخصة ردت : مش عندنا روح المعادي و القت الرخصة الي كأنها عقرب سام!!! و تابعت دردشتها الودية مع زميلتها في الشباك المجاور في محاولة لتسلية صيامهم بدون وجع دماغ المواطنين
حاولت انتزاع المعلومات منها انتزاعا - و بعد اصرار مني و تجاهل منها وافقت على اجابة تساؤلاتي
قالت: يا استاذ الرخصة مكتوب عليها صادر معادي
قلت: بس انا متصور هنا اصلا و ممتحن هنا و مطلعها من هنا
قالت : مش مهم طلعت منين المهم النهارده هي منين - من المعادي
قلت : بس من المعادي دي بدل فاقد
قالت بطلوع روح: من المعادي يا استاذ!!!!! المخالفات من هنا و البيانات من المعادي
توجهت الى نيابة عين الصيرة ( موجودة في مبني مجاور داخل مرور المعادي )
و لله الحمد كان هناك 4 مواطنين فقط
المعاملة افضل نسبيا في النيابة
سأل الموظف وكيل النيابة تساؤل ان كان بالامكان استخراج شهادة مخالفات فوافق ( ولله الحمد )
في دردشة ودية مع الموظف سألته: ينفع يعني يفسحوني كده بين 3 ادارات مختلفة بالشكل ده
قاللي يا افندم انت المفروض المخالفات من مرور الدراسة لكن انا استأذنت من وكيل النيابة اطلعهالك لان الدنيا صيام!!!!!!!!!!!!!!!!!!!
قلتله : طب تعالى ابوسك بقى
قاللي : لأ شكرا
و الحمد لله استخرجت شهادة المخالفات ( الساعة ال 12 ظهرا!!! )
و توجهت على الفور الى مرور المعادي
وصلت الى مرور المعادي فاذا به خرابة محترقة و مدمرة!!!
و لا توجد اي ورقة توجيه او توضح المكان الجديد
سألت قائد سيارة مار بالصدفة - فقام مشكورا بالاتصال بصديق له يعمل بالداخلية
فاخبره انه تم افتتاح مكاتب معادي مؤقته في زهراء المعادي
فتوجهت على الفور الى زهراء المعادي و هناك اكتشفت ان المكاتب الجديدة بجوار اميريكان بيشو سيتي في اراضي اوروبا 2000 للنظافة ( اخر زهراء المعادي )
منطقة مقطوعة و شوارع مدقات ترابية رملية صخرية مختلطة!!! لا يوجد للاسفلت فيها اثر!!!
المهم...
وصلت الساعة 12:35 الى مرور المعادي
توجهت الى الشباك فقام الموظف ( الشباك برضه كان فاضي!!!! ) باخباري : حضرتك تشرفنا يوم السبت لان الخزنة بتقفل الساعة 12 !!!!
انتهى اليوم الاول!!!
|