المشاركة الأصلية كتبت بواسطة mamostafasayed
هل الشيفولية اللانوس مكوناتها صينية وليس كورية وهل الافضل منها الفيرنا  |
الحقيقة ان كل واحد مش هيقدر يفيدك غير بوجهه نظره الشخصية , لأن السؤال ده تقدر تقول عليه من الأسئلة المطلقة اللى ملهاش أجابة محددة وإنما إجابات تقديرية تختلف حسب رؤية كل شخص والعبرة فى النهاية بحكمك انت شخصياً وتقديرك لمتطلباتك وتقييمك الشخصى لكل واحدة من العربيتين دول.
عموماً أنا بأستأذنك أشارك برأيى الشخصى وهو أن اللانوس فعلاً مكوناتها صينية ومصرية (الزجاج مثلاُ مصانع د/جريش) ومعتقدش ان ده عيب لأن مش كل منتجات الصين رديئة ولكن فى مستوى معين من ضبط الجودة لعلامة شيفرولية و GM غير مسموح بالتنازل عنه ... وعموماً إذا كانت دى نقطة المقارنة بين اللانوس والفيرنا فمين قال ان مكونات الفيرنا كورى بالكامل وليست صينى.
عموماً أعتقد ان التقييم بين العربيتين (اذا حصرنا المقارنة بينهم فقط ومدخلناش الرينو لوجان والكيا ريو بنفس السعر) لازم تشمل حاجات تانية كتير ومن اهمها ايه هو المقابل قصاد المبلغ المدفوع بمعنى انك هتدفع 6990 جنية فى اللانوس الكاملة ال 1500 سى سى وهتاخد باور ستيرنج وأزاز كهرباء وفوانيس شبورة ومرايا كهربا ناحية الراكب الامامى وراديو بدون اريال (بهوائى) ومفيش ريموت .... لكن فى حالة الفيرنا هتدفع 72250 جنية فى الفيرنا الكاملة ال 1600 سى سى وهتاخد باور ستيرنج وأزاز كهرباء وبس بمعنى مفيش مرايات كهربا ولا فوانيس شبورة والراديو بأريال كهربا بس فى ريموت ....
أدرس النقاط دى بالراحة وشوف طلباتك أيه وحاول تقعد فى كل عربية منهم ولو امكن تجرب تسوقها واختار الشكل المريح ليك اكتر وخد قرارك بتمهل وبدون تسرع وفى النهاية العربيتين تجميع مصرى ووكيل محلى وقطع غيار رخيصة ومتوفرة جداً وصيانة سهلة لأى ميكانيكى وأكسسوارات متنوعة وماسكين سعر اعادة بيع ... ومدامت شغالة تاكسى بوفرة كدة ده فى صالح وفرة ورخص قطع الغيار والمصنعيات.
اتمنى انى ماكونش اثقلت عليك وزى ماقولت فى الاول ده تقييمى انا الشخصى والعبرة فى النهاية لرأيك وقرارك انت فقط.