رد: عايز ابطل سجائر . اعمل ايه؟؟؟؟
بسم الله الرحمن الرحيم
انا كنت من المدخنين بشراهه ، الحمد لله انا دلوقتي بقالي 15 شهر لاني بطلت السجاير من 24/5/2010
الموضوع بسيط جدا يا جماعه وموضوع النيكوتين والادمان دا كلام فاضي انت مش بتشم هيروين يعني
التدخين ما هو الا عاده ، حاجه اتعودت تعملها في وقت معين في مكان معين.
وعشان تبطل ماينفعش موضوع انا بدال ما اشرب علبتين نخليها علبه وبعد العلبه 10 سجاير لانك في خلال الفتره دي هتقابلك مشكله مثلا تلاقي نفسك شربت 3 علب وهتلاقي نفسك بتلف وتدور مع ان الهدف واضح
عايز تبطل سجاير يبقي فورا وبلاش تضحك علي نفسك
انت ممكن تجرب حاجه واحده تثبتلك ان السجاير دي ما هي الا عاده
كلنا بنموت ونشرب سيجاره مع الشاي ، جرب انك تشرب الشاي من غير السيجاره
اول مره هتلاقي الموضوع صعب ،تاني مره الاحساس بيكون ااقل ، تالت مره هيقل اكتر وهكذا لحد ما تتعود تشرب الشاي من غير سجاير
انا شخصيا كنت كدا لدرجه اني لما اتخلصت من كل المواقف اللي كنت باعملها وانا باشرب السيجاره واتعودت عليها من غير سيجاره ما فضلش غير موقف واحد وهو وانا مسافر متعود اسافر بالقطر قبل ما اشتري العربيه " وطبعا لازم طول وقت السفر ااقف بين العربات واحرق في السجاير" ووقتها كنت مبطل السجاير بقاللي 5 شهور تقريبا واول ما ركبت القطر لقيت نفسي عايز اشرب سجاير ومش قادر ااقعد علي الكرسي طبعا طردت الاحساس دا في لحظتها وبعد كدا سافرت مرة واتنين وتلاته والاحساس دا ما رجعش ليا تاني
الحمد لله رب العالمين الذي عافاني
ثم انا كنت باشرب من علبتين ل تلاته يوميا والعلبه في وقتها كانت ب 8.5 تقريبا ، يعني المتوسط 20 جنيه يوميا يبقي 600 جنيه في الشهر
انا فكرت 600 جنيه في الشهر ممكن يعملولي كتير دول تقريبا نص قسط عربيه زيرو ، او لو ضفتهم علي ايجار شقتي مثلا اتأجرشقه في مكان ارقي وافضل.
انا اتخذت قرار اني ابطل سجاير في اسبوع ابني زياد وفكرت بعقلي ايه ذنب طفل زي كدا يتعرض لدخان سجاير مسمم ، ولما يكبر ويشرب هو كمان لانه شايف ابوة بيشرب قدامه والسجاير دي اول الطريق
اول طريق انك ممكن تبدأ تفكر في المخدرات زي البانجو والحشيش ، لكن اللي مش بيدخن عمره ما هيفكر في حاجه زي دي ابدا
نسيت ااقولك انك ممكن تشتري هولز بالنعناع مثلا وكل ما تحس انك عايز تشرب سيجاره خد واحده واشتري لب وقزقز
الموضوع محتاج بس عزيمه واصرار وانك دايما تفكر بانك انت غلط وان اللي مش بيدخن احسن منك لانه بيحافظ علي صحته ويحافظ علي فلوسه ويحافظ علي دينه برضه
والله العظيم لما كنت باشرب سجايرما كنت باحس في خشوع في الصلاه اصلا وكنت باحس ان باعمل حاجه حرام
اخيرا ربنا يعافي كل مدخن وكل مبتلي مسلم
__________________
|