[تامر ديزل]

السلام عليكم
كنت عاوز اعمل موضوع جديد للتقسيم اللي ها تكلم عليه دلوقتي وبعدين قولت جديد ليه ما نكمل هنا وخلاص خصوصا بعد الاربع مشاركات اللي جم في نفس واحد شجعوني اني اكمل بعد ما كان الموضوع اتنسى شويه
بعد ماقسمنا القوى السياسية في مصر عاوز رأيكم في تقسيم الشعب نفسه من حيث التفكير والفهم
فيه ناس فاهمة الامور والحياة صح وبتحاول تفهم غيرها رغم المجهود المرهق وفيه ناس فاهمه ومايهمهاش التانيين يفهموا ولا لأ وفيه ناس فاهمه وبتستغل عدم فهم الاخرين في الضحك عليهم وقيادتهم وفيه ناس فاهمة غلط وبتحاول تفهم غيرها الغلط وفيه ناس بردوا فاهمه غلط ومايهمهومش انه التانيين يشاركوهم الفهم الغلط واخر ناس هما اللي مش فاهمين لا صح ولا غلط وحياتهم ماشية بالقصور الذاتي او بالجاذبية الارضية عايشين وخلاص ومش عايزين يوجعوا دماغهم انما تقدر تقول شغالين بعواطفهم او بمزاجهم
مش ده المهم
المهم انك تتخيل معايا تباديل وتوافيق للمجتمع المصري بانتمائه السياسي وقدرات مخه
ممكن مثلا تتخيل حوار بين يميني فاهم سياسه مع مواطن عادي مش فاهم بيبقى الحوار كأنه درس ديني مش سياسي
ليبرالي فاهم صح مع يميني فاهم غلط بيبقى الحوار من نوعية ياجاهل يارجعي التاني يقوله ياعدوالله مع ان الحوار اصلا عن الانتخابات او سلطة العسكر او اي حاجه تانيه
خد بالك بقى
يميني فاهم وبيستغل عدم فهم الاخرين مع ليبرالي فاهم وبيستغل عدم فهم الاخرين الحوار بينهم هوا هوا اللي بتشوفه يوميا على الفضائيات في البرامج الحوارية ناس بتشتغلنا ولا واحد فيهم صريح و دوغري وبيقول هوا ناوي على ايه
ياللا بقى تخيلوا باقي النوعيات من الحوار بين اللي فاهم واللي مش فاهم حسب انتمائاتهم السياسية
واستمتعوا
سلامو عليكم