بسم الله الرحمن الرحيم
هو مصر ممكن تبقي دولة متقدمة بالموظفين الحاليـين ؟!
قولنا العيب في الحكومة و غيرناها و جيبنا عصام شرف حبيب الملايـين
قولنا العيب في المحافظين و غيرناهم كلهم
قولنا العيب في الرئيس و خلعناه و جه المجلس العسكري و الجيش حبايبنا
قولنا العيب في ان احنا حاسين ان دي مش بلدنا .. و حصلت ثورة و بقت بلدنا
طب بعد ده كله لـــــــــيه الموظفين لسه بنفس رخامتهم !!
لـــــيه لسه بيروحوا الشغل قبل معاد الانصراف ب نص ساعة !!
لـــــيه لازم تيجي بواسطة أو تدفع رشوة ( رشا كما يدلعها البعض ) !!
لــــيه الستات بيفضلوا يسألوا و يرغوا و في الأخر يقولوا استني لما كذا يجي !!
نازل من بيتنا انهرده عشان اجيب ورقة بيان حالة من الكلية و بعدها اسافر اقدم في العاشر
وصلت الكلية .. ودخلت شؤون الطلبة
و عندنا شؤون الطلبة ستات .. فــ رايح و متأكد انه يوم أسود
بس قولت يمكن يراعوا ان احنا في رمضان و صايمــين مثلا
قولت لواحده منهم لو سمحت عايز بيان حالة
قالت .. لـــيه
بغض النظر عن ان مش من حقها تسأل قولتلها عشان أحول كلية تانية
قالت .. لــــيه
بغض النظر تاني مرة قولتلها مش مستريح في الكلية عايز اروح هندسة
قالت فــــين
بغض النظر تالت مرة قولتلها العاشر
راحت منقولة علي كرسي تاني و فضلت ساكتة دقيقة
و بعد الاسئلة دي كلها قالت استني مدام ماجدة بقي هي اللي بتعمل الورق ده !!
قولتلها هتيجي امته مدام ماجدة
قالت كمان نص ساعة كدا ..
الكلام ده كنا الساعة 11:30 الظهر !!
امال لو جيت الساعة 9 الصبح .. كنت هلاقي شؤون الطلبة مقفولة !!
قولت اللهم اني صائم و مشيت عشان جالي الضغط و أنا واقف منها
ده بالنسبة للكلية .. لو حكيت بالنسبة للمرور فــ حدث ولا حرج عنه
سؤال أخير : الرئيس و الوزير و المحافظ بيتخلعوا عادي ..
طب الشعب نعمل فيه ايــــــه ؟!