[biomedo]

المشاركة الأصلية كتبت بواسطة ALNAZER بص يايا باشا اولا اللى بيكلمك سروجى سيارات و ليا جروب على الفيس بوك اسمه الناظر لفرش السيارات لما تحب تدخل و تشوف اعمالى ومتسألنيش انت فاتح فين لانى بالتأكيد انا بعيد أوى أوى عنك لانى من أسوان بالنسبة لفك الفرش : انت هتحتاج مفك عادة و مفك صليبة و زاوية 12/13 طويلة 1- فك الكرسى الامامى اليمين : ترفع دراع المجرى بتاع الكرسى و ترجع الكرسى لورا على الاخر وتبص من قدام تحت الكرسى هتلاقى مسامرين فى طرف المجرى هتفكهم بالزاوية واحد موجود من برا ناحية الباب و التانى موجود من جوا ناحية قفل الحزام بعد ما تفكهم ترفع دراع المجرى و تقدم الكرسى لقدام على الاخر و تبص على الكرسى من ورا تحت هتلاقى مسامرين عند الطرف الاخر للمجرى واحد من برا و التانى من جوا تفكهم بالزاوية و ترفع الكرسى تطلعو برا العربية 2- فك الكرسى الامامى الشمال : نفس خطوات الكرسى اليمين الظبط بس قبل ما تشيل الكرسى علشان تطلعو برا العربية تحط ايدك تحت الكرسى هتلاقى سلك فى نهايته فيشة لازم تفك الفيشة دى بايدك و هى فيشة حزام الامان و بعدها تطلع الكرسى برا العربية 3- فك المخدة الخلفية : تفتح الباب الخلفى اليمين و تحط ايدك عند طرف المخدة و تشدها لفوق جامد هتطلع معاك تروح الناحية الشمال و تعمل نفس الخطوة بكده فكيت المخدة من برا و بعدين تيجى بين المخدة و المسند و فى النص بالظبط هتلاقى مسمار تدخل الزاوية بين المخدة و المسند و تفكه و تسحب المخدة على برا العربية 4- فك المسند الخلفى : هتبص تحت مكان المخدة هتلاقى فى الاجناب مسمارين واحد ناحية اليمين و التانى شمال تفكهم بالزاوية و بعدين تزق المسند لفوق من الجنب اليمين و بعدين من الخنب الشمال و تطلعو برا العربية و بكده يا حلو تبقى فكيت كل الكراسى بس ناقص حاجة مهمة و هى تشبط كل المسامير اللى انت فكيتها فى اماكنها الصحيحة مرة تانية علشان ما تضعش منك و كمان علشان لما ترجع تركب الكراسى تانى تبقى عارف اماكن تثبيتها و ما تتلخبطش تيجى بقى لفبرة عصاية الفتيس و فبرة فرملة اليد ( الكنسولة ) تبدأ اولا بكنسولة فرملة اليد : 1- تطلع طفاية السجاير من مكانها هتلاقى تحتها مسمار تفكه بالمفك الصليبة 2- فى طرف الفبرة من قدام و تحت فرملة اليد هتلاقى فبرة صغيرة شكلها بيضاوى مغطية فتحة تستخدم طرف المفك العادة و تنترها بشويش هتلاقى فى الفتحة من جوا مسمار فكه بالمفك الصليبة و طلع الفبرة برا العربية تيجى لكنسولة عصاية الفتيس : بعد ما تطلع فبرة فرملة اليد هيظهر مسمار تحتها فى نهاية كنسولة عصاية الفتيس فكه بالمفك الصليبة و بعدين تنزل تحت التابلوه من قدام هتلاقى مسمار فى طرف الكنسولة المامى ناحية اليمين و مسمار تانى ناحية الشمال تفك المسمارين و تطلع الكنسولة بشويش و من غير استخدام العافية و خلى بالك تفك فيش كل من الولاعة و مفاتيح زجاج الكهرباء لو كانت عربيتك من النوع اللى بتكون المفاتيح فيها موجودة بالكنسولة كده يفضل معاك العتب الفبر اللى عند الابواب و اللى ماسك اطراف دواسة الارضية و دا كله مثبت بكلبسات هتستخدم طرف المفك العادة بعناية و تشدها لفوق لحد ما تفك الكلبسات كلها تطلع معاك الفبرة و بكده بقت الدواسة معاك حرة من جميع الاطراف تطلعلها برا العربية و تبدأ شغلك يا ريس تحط لبادك مكان ما انت عاوز و تثبته بالكلة ( اللزق الخاص ) و ترجع تعمل نفس الخطوات اللى فاتت لكن من الاخر الى الاول بحيث تركب الكراسى الامامية اخر حاجة ......... و معاك ربنا يا مان

شكراً
بس هو انت بتشرح على اني عربيه