[حسام البورسعيدى]

اولا كل سنة وانت طيب ورمضان كريم عليك ..

ثانيا الف مبروك عليك الليجانزا وربنا يباركلك فيها وتتبسط منها ..




ثالثا بالنسبة لموضوعك وبما انك زيرو فى الميكانيكا فمضر اسالك كام سؤال بعد اذنك :

- هل الفتيس بيعمل اصوات غريبة عند تعشيق الغيار وخصوصا عند تعشيق المارشليه والاول ؟؟

- الدبرياج بتاعك عالى ولا واطى .. بمعنى انه لو عالى هيفصل فى بدايه مشواره وانتا بتدوس عليه اما لو واطى هيفصل فى نهاية مشواره قبل ما ينزل للاخر ؟؟؟

ولو الدبرياج واطى زياده بيسبب صعوبة التعشيق والصوت اللى قلتله عليه ..


وتظبيط الدبرياج سئ بسيط خالص لو الدبرياج عندك على واير (يعنى بسلك زى فرامل العجلة كده او ميكانيكى يعنى) .. اما لو الدبرياج على زيت (هيدروليك يعنى) يبقى الموضوع اصعب شوية بس بسيط برضو متقلقش ..

كمان بما اني اول مره اشتري عايز اعرف هو ايه الميه اللي تتزود وامتي وامتي اغير الزيوت وايه هي

- الميه اللى بتتزود هى ميه التبريد وبتزودها من الريدياتير مباشره (لو العربية بارده) او من قربة الميه (مش هتفرق العربية سخنة او بارده) .. مع مراعاه ان الميه فى القربة تكون عند علامة MAX ...

- لو العربية فيها ميه ملونة (خضرا او حمرا) ممكن تزودها ميه ملونة او تزودها ميه عادية بس يفضل تكون مقطره او مفلتره (يعنى ميه من الفلتر او الميه اللى بتخرج من التكييف) ...


- بما ان العربية جديدة معاك يفضل انك بعد ما تزودها وتظبطها تراجع عليها كل يوم علشان لو بتنقص بسرعة تزودها اول بأول وتبدأ تدور على اى تسريب او سبب لنقصان الميه ...


اما بالنسبة للزيوت فعندك فى العربية كذا نوع من الزيوت ..

اول نوع وهو الاهم زيت الموتور .. وده انواعه كتير جدا واسعاره كتير جدا (عندك من 50 جنية الى 300 جنية واكثر) .. حسب نوعه وتصميمه والمسافة اللى العربية ممكن تمشيها بيه ...

وعندك برضو زيت الفتيس المانيوال .. وده فيه ناس بتقول انه مبيتغيرش .. بس انا رأيى الكلام ده مش مظبوط خالص لان اى حاجة فى الدنيا ليها عمر .. واكيد زيت الفتيس المانيوال ليه عمر برضو ..

بس ده بيتغير على فترات متباعده .. لو معاك الكاتالوج او لو عرفت تجيبه من على النت شوف المفروض يتغير كل اد ايه لو استنى حد من خبراء الليجانزا هنا فى المنتدى علشان يفيدك فى النقطة دى ...

عندك برضو زيت الباكم او زيت الفرامل (وزيت الدبرياج فى نفس الوقت لو الدبرياج على زيت زى ما قلتلك) وده تغييره مش مهم قوى ولكن يفصل تغييره كل سنه او سنه ونصف .. او مع كل تغيير لتيل الفرامل ..

وطبعا زيت الفرامل له قربة فى الكبوت بيتحط فيها ولازم يكون مستواه فى القربة عند علامه MAX .. وكمان الفرامل ليها لمبه فى التابلوه لو الزيت نقص جامد (لاى عطل) اللمبه دى بتنور ...


واخر نوع زيت هو زيت الباور ستيرنج .. وده الزيت بتاع الباور اللى فى الدريكسيون والزيت ده مش بيتغير دوريا ..

والزيت ده نفس زيت الفتيس الاتوماتيك وافضل نوع منه موبيل .. اللتر ب 30 جنية تقريبا ..

وزيت الباور برضو ليه قربة ولازم يكون عند علامة MAX ...



اما الحاجات اللى المفروض تشيك عليها دايما :

- الميه (ودى اهو حاجة)

- زيت الموتور (من المقاس الخاص بيه)

- زيت الفرامل والباور ..

- حالة الكاوتش وضغط الهوا (يعنى الكاوتش يكون كويس والنقشة بتاعته واضحة مش ممسوحة وممكن كل اسبوع تراجع ضغط الهوا فى الكاوتش وده بما انك بتسافر كتير) ...



ولنصائح للمبتدين عليك بقى وعلى الموضوع ده لزميلتنا CARDIO ..

اسئله المبتدئين ..عفوا ممنوع الفتى ))




يا رب يا غالى اكون قدرت افيدك بالقدر الكافى .. واى استفسار تانى انا تحت امرك دائما ......