اهلا بيك في مصر موتورز
بص يا باشا الابيزا مبدئيا عربية ممتازة عن تجربة الكلام ده و الابيزا بالنسبة للشراء شأنها شأن اي عربية في الكشف عليها هتاخد معاك 2 سمكري و ميكانيكي سمكري يبص علي الاحواض و القوايم و الصاج عموما كرتيرات عتب ابواب رفارف يشوف لو كانوا سولام ولا كانوا مفرومين قبل كده يشوف فيها بارومه ولا لا يعني حالة الصاج عموما
اما الميكانيكي يكشف موتور و شاسيه و عفشه و فتيس و يشوف العربية نضيفة ولا لا و الموتور يا ريت تقيس الكبس بتاعه في اي بنزينة فيها جهاز قياس كبس المحرك عشان تعرف بيدي بنسبة كام %
العفشه حاجتها كلها متوفرة مش غالية و مش رخيصة متوسطه بس حاجات اعتمادية و بتعيش جدا جدا جدا و دي يتكشف عليها عند عفشجي و ليكن مصطفي الباشا في البحر الاعظم ممتاز ممتاز ممتاز
و يا ريت تقولي اسئلة محددة انا مش مكسل اكتب بالعكس انا بس عايز اعرف تساؤلات محددة ارد عليها لان الموضوع متشعب اوي و يا ريت تقول انت ساكن فين و ادامك عربية ولا لا عشان انا هخلص امتحانات 17/6 لو اتمكنا اننا نتقابل و توفر علي نفسك الارف و اشوف العربية معاك و اجربها يبقي قصرت عليك مسافة كبيرة و نكشف عليها برضه بس انا حافظها و عارف كل اللي فيها و الحمد لله فا اعتقد اني هقدر اسد في الموضوع ده
انا قلتلك شوية اساسيات تمام كده الميكانيكا يفضل انك تكشف عليها عند محمد سمير ورا حديقة بدر في جسر السويس يا اما عند ماستر فولكس هنا في الهرم بس دول كشف و بس متصلحش عندهم اظن قصدي واضح تمام
يعني الموضوع سهل و بسيط و يا ريت تقول معاك كام و عايز اداء عالي ولا هتكتفي بأداء الستوك عشان تعديلات الابيزا كلها سهلة و معروفة زيها زي الجولف و ممكن نقلبهالك طيارة بجناحين بس كله حسب امكانياتك