[تامر ديزل]

السلام عليكم
كنت عاوز اكلمكم النهارده عن ثغرة في النظرية اللي بدات بيها الموضوع ولكن متهيألي انه الافضل اني اناقش الاساتذه والزملاء اللي ردوا عليا علشان تكتمل الفائدة
ابدأ بالاستاذ الكبير ابو نورا اولا انا شرف ليا اني اتناقش مع حضرتك بما لك من خبرة وعلم وعاوز اوضح بعض النقط اللي حضرتك ذكرتها في مناقشتك ليا يوم 31 يوليو
اولا بخصوص الناس اللي كانوا في التحرير من 8 يوليو وحضرتك بتقول انهم خليط من كل الناس فعلا كلامك مظبوط وده اللي انا قولته في مشاركتي يوم 3 اغسطس لما قولتان الليبراليين قدروا يحسوا بتململ الكتلة الشعبية من بطئ المحاكمات فنزلوا الميدان ونزل معاهم المتحمسين من الكتلة الشعبية
ثانيا حضرتك شايف انهم مش اغلبية وانا مازلت متمسك برأيي انه لو الاغلبية الصامته يوم 28 يناير صلوا الجمعه وروحوا بيوتهم كالمعتاد وسابوا الناشطين من جميع التيارات يواجهوا الامن لواحدهم ماكنش لا فيه ثورة ولا غيره ده رايي الشخصي والاختلاف في الاراء بيدي حيوية للمناقشات
ثالثا الاتهام القاسي بان الصمت كان خنوع اوشيطنه معلهش انا عاوز نسميه اسم ارق يمكن يفتح عينينا على حقيقة احنا ناسيينها والاسم هوا حب الاغلبية للاستقرار وده سلوك انساني عام وله عيب انه بيشجع الفاسدين على التمادي في فسادهم ولكن له ميزه كبرى ان الاستقرار هو العنصر الاساسي في الانتاج يعني بلد فيها فساد ممكن تعيش وكانت فعلا عايشه انما بلد بدون استقرار تبقى عامله زي الصومال وافغانستان والعراق