[احمد على 1999]

عذرا على العنوان لانى خفت اكتبه عنوان تقليدى محدش يقراه

اندهشت لما سواق التاكسى قالى و انا بربط الحزام مش مهم انت تربطه يا بيه هما بيدققوا على السواق بس !!
بجد و الله مكنتش اعرف انهم اخترعوا الحزام علشان القانون المصرى بيلزم السواق انه يحطه ( لزوم الشياكة يعنى )
مشكلتنا اننا بنعشق خرق القوانيين بس مش عارفيين ان فى قوانيين مينفعش تنتهك قوانين الفزياء
و احنا صغيرين فلقونا بقوانين نيوتن و منهم
يبقى الجسم الساكن ساكنا طالما لم يؤثر عليه مؤثر خارجى
و يبقى الجسم المتحرك متحركا طالما لم يؤثر عليه مؤثر خارجى

و انا فهمت الدرس بل و طبقته عمليا كمان
و انا رايح درس الانجليزى و كنت طاير بالعجلة ( بورسعيد كانت كلها عجل ) و كان فى تاكسى قدامى و انا طاير وراه المهم كان فى بنت ماشية على الرصيف و انا ما بعاكسش اصلا بس مش عارف ليه بصيت عليها تانى حاجة شفتها التاكسى بيعدى من تحتى ! مش عارف ليه و اترزعت على الارض قدامه و قمت وقفت وسط دهشة الشارع كله
ببص على التاكسى لقيته واقف فى اشارة و السواق بيبصلى و هو فاتح بقه و مبرق
رحت منفض هدومى و ايدى و راجع زى الشاطر ورا التاكسى و شديت العجلة من تحت الاكصدام لانها رشقت بين الاكصدام و الارض

تفسير الى حصل ان التاكسى وقف فى الاشارة و العجلة رشقت فيه من ورا و انا طبقت قانون نيوتن و فضلت متحرك و طرت من فوق التاكسى

تخيل بقا و انت راكب العربية و سايق فانت ماشى بنفس سرعة العربية يعنى تخيل نفسك راكب كرسى ماشى لوحده فى الهوا و انت قاعد عليه بسرعة 80 كم / س مثلا

فلو انت مش رابط الحزام و العربية خبطت و وقفت فانت مكمل ملكش دعوة بالعربية و غالبا القوة الى حتتولد من القصور الذاتى على كتلة جسمك ممكن تقترب او تعدى طن او طن ونص فى اتجاه الحركة فانت حتخرج من البرابريز مش من الباب زى ما انت متعود دايما